ചൊവ്വാഴ്​ച നാട്ടിൽ പോകാനിരുന്ന മലയാളി സാമൂഹിക പ്രവർത്തകൻ മക്കയിൽ നിര്യാതനായി

മക്ക: പ്രവാസ ജീവിതം അവസാനിപ്പിച്ച്​ ചൊവ്വാഴ്​ച നാട്ടിൽ പോകാനിരുന്ന മലയാളി സാമൂഹിക പ്രവർത്തകൻ മക്കയിൽ നിര്യാതനായി. മക്ക കെ.എം.സി.സി സെക്രട്ടറി മലപ്പുറം കൂട്ടിലങ്ങാടി കീരമുണ്ട് സ്വദേശി ഹംസ സലാം (50) ആണ്​ മക്കയിലെ അൽനൂർ ആശുപത്രിയിൽ മരിച്ചത്​. മൂന്ന് പതിറ്റാണ്ട് മക്കയിലെ സാമൂഹിക മേഖലയിൽ സജീവ പ്രവർത്തകനായിരുന്നു.

ഹജ്ജ് സേവന രംഗത്തും മക്ക കെ.എം.സി.സിയുടെ ജീവകാരുണ്യ പ്രവർത്തനങ്ങളിലും സജീവമായിരുന്നു. മക്കയിൽ ഹറമിനടുത്തുള്ള ലോഡ്ജിൽ ഇലക്ട്രിക്കൽ എൻജിനിയറായി ജോലി ചെയ്യുകയായിരുന്നു. പ്രവാസ ജീവിതം അവസാനിപ്പിച്ച് ചൊവ്വാഴ്​ച നാട്ടിൽ പോകാനുള്ള ഒരുക്കത്തിലായിരുന്നു.

ഭാര്യ: സീനത്ത്, മക്കൾ: സദിദ, സബീഹ, സഹബിൻ. മരണാനന്തര കർമങ്ങൾ പൂർത്തീകരിച്ച് ഹറമിൽ മയ്യിത്ത്​ നമസ്കരിച്ച് ജന്നത്തുൽ മുഅല്ലയിൽ ഖബറടക്കുമെന്ന് മക്ക കെ.എം.സി.സി ഭാരവാഹികൾ അറിയിച്ചു.