വാഹനാപകട കേസിൽ മലയാളിക്ക്​ മൂന്ന് വർഷത്തിന് ശേഷം ജാമ്യം 

റിയാദ്: രണ്ട്​ സൗദി പൗരന്മാരുടെ മരണത്തിന്​ കാരണമായ വാഹനാപകട കേസിൽ പ്രതിയായി സൗദി ജയിലിൽ കഴിഞ്ഞിരുന്ന മലയാളിക്ക് മൂന്ന്​ വർഷത്തിന്​ ശേഷം ജാമ്യം. തിരുവനന്തപുരം പോത്തൻകോട് അരിയക്കോട് സ്വദേശി വിപിനാണ്​ (34) സാമൂഹികപ്രവർത്തകരുടെ ഇടപെടലിലൂടെ പുറത്തിറങ്ങാനായത്​. റിയാദിൽ നിന്ന് 300 കിലോമീറ്റർ അകലെ ദവാദ്മിയിലെ ജയിലിലായിരുന്നു വിപിൻ. അപകടത്തിൽ മരിച്ചവർക്കുള്ള നഷ്​ടപരിഹാരമായി ഉദ്ദേശം 50 ലക്ഷം ഇന്ത്യൻ രൂപക്ക് തുല്യമായ മോചനദ്രവ്യം നൽകിയാലേ മോചനം സാധ്യമാകു എന്ന അവസ്ഥയിലാണ് മൂന്നുവർഷമായി ജയിലിൽ കഴിയേണ്ടി വന്നത്. 

ഇൗ പണം മരിച്ചവരുടെ അനന്തരാവകാശികൾക്ക് നൽകണം എന്നായിരുന്നു കോടതിവിധി. ദവാദ്മി നഗരത്തിൽ മൂന്നു വർഷം മുമ്പാണ് കേസിന്​ ആസ്പദമായ അപകടം സംഭവിച്ചത്. വിപിൻ ഓടിച്ചിരുന്ന വെള്ളം വിതരണം ചെയ്യുന്ന ടാങ്കർ സ്വദേശികൾ സഞ്ചരിച്ച വാഹനവുമായി കൂട്ടിയിടിച്ചായിരുന്നു അപകടം. റോഡിൽ സിഗ്​നലിൽ യൂടേൺ തിരിയാൻ വണ്ടി നിർത്തിയപ്പോൾ പിന്നിൽ വന്ന പിക്കപ്പ് വാൻ ഇടിച്ചുകയറുകയായിരുന്നു. അതിന്​ പിന്നിൽ മറ്റൊരു പിക്കപ്പ് വാനും വന്നിടിച്ചു. കൂട്ടിയിടിയുടെ ആഘാതത്തിൽ നടുവിൽ അകപ്പെട്ട പിക്കപ്പിലെ ഡ്രൈവറും സഹയാത്രികനും തൽക്ഷണം മരിച്ചു. മരിച്ച രണ്ടുപേരും സൗദി പൗരന്മാരായിരുന്നു. 

സൗദി ട്രാഫിക് നിയമപ്രകാരം ഏറ്റവും അവസാനം വന്നിടിച്ച വാഹത്തിലെ ഡ്രൈവർക്കാണ് അപകടത്തി​​െൻറ ഉത്തരവാദിത്വമെങ്കിലും വിപി​​െൻറ വാഹനത്തിന്​ ഇൻഷുറൻസ് ഇല്ലാത്തത്​ വിനയായി മാറുകയായിരുന്നു. ഇൻഷുറൻസ് ഇല്ലാത്ത വാഹനം ഓടിച്ച്​ അപകടത്തിന്​ ഉത്തരവാദിയായി എന്ന കാരണത്താൽ വിപിൻ കേസിൽ പ്രതിയായി. തുടർന്ന്​ മൂന്നുവർഷം ജയിലിലും കിടന്നു. 

ദവാദ്മിയിലെ ഹുസൈൻ എന്ന സാമൂഹിക പ്രവർത്തക​​െൻറയും ഐ.സി.എഫി​​െൻറയും ഇടപെടൽ വിപിന് തുണയായി. ഹുസൈൻ ആൾ ജാമ്യം നിൽക്കാൻ തയാറായതോടെ ജയിൽ മോചനത്തിന്​ വഴി തെളിയുകയായിരുന്നു. ഇൗ ജാമ്യത്തിലാണ്​ ഇപ്പോൾ പുറത്തിറങ്ങിയത്​. മൂന്നുലക്ഷം റിയാൽ കോടതിയിൽ കെട്ടിവെച്ചാൽ മാത്രമേ വിപിനും ജാമ്യം നിന്ന ഹുസൈനും രാജ്യം വിട്ട്​ പോകാനാവൂ എന്ന ഉപാധിയുടെ അടിസ്ഥാനത്തിലാണ്​ ജാമ്യം. ദാവാദ്മിയിലെ അബ്​ദുൽ അസീസ് എന്ന പൊലീസ് ഉദ്യോഗസ്ഥ​​െൻറ ഇടപെടലും ജാമ്യത്തിന് സഹായമായി. കേസുമായി മുന്നോട്ടുപോകുമെന്നും പൂർണമായ ​ജയിൽ മോചനത്തിന്​ ശ്രമം നടത്തുമെന്നും ഹുസൈൻ ‘ഗൾഫ്​ മാധ്യമ’​ത്തോട്​ പറഞ്ഞു.