മലയാളി നഴ്​സ്​ ലതാരാജനെ സോഷ്യൽ ഫോറം ആദരിച്ചു

അബ്ഹ: കോവിഡുമായി ബന്ധപ്പെട്ട് ആതുരസേവന മേഖലയിൽ മികച്ച പ്രവർത്തനം നടത്തിയ മലയാളി നഴ്​സ്​ ലതാരാജനെ ഇന്ത്യൻ സോഷ്യൽ ഫോറം ആദരിച്ചു. ഇവർ ജോലി ചെയ്തിരുന്ന ആശുപത്രിയിലെ പല രോഗികൾക്കും വീട്ടിൽനിന്ന് ഭക്ഷണം ഉണ്ടാക്കി കൊണ്ടുപോയി കൊടുത്ത് സഹായിക്കൽ പതിവായിരുന്നു. ബൈപാസ്​ സർജറി കഴിഞ്ഞ മുഹമ്മദെന്ന യു.പി സ്വദേശിക്ക് ഒരു വർഷത്തേക്കുള്ള മരുന്നിന് പുറമെ ആശുപത്രി ജീവനക്കാരുടെയും മറ്റു സാമൂഹിക പ്രവർത്തകരുടെയും സഹകരണത്തോടെ ധനസഹായം സമാഹരിച്ച് അവരുടെ കഷ്​ടപ്പെടുന്ന വീട്ടുകാർക്ക് അയച്ചുകൊടുക്കാനും മുന്നിട്ടിറങ്ങിയത് ലതയായിരുന്നു.

അബഹയിൽ നടന്ന ചടങ്ങിൽ ഫോറം റീജനൽ പ്രസിഡൻറ് കോയ ചേലേമ്പ്ര, കോൺസുലേറ്റ് സാമൂഹിക ക്ഷേമ വിഭാഗം വളൻറിയർ ഹനീഫ് മഞ്ചേശ്വരം എന്നിവർ ചേർന്ന്​ ലതാരാജന്​ ഉപഹാരം കൈമാറി. ഹനീഫ ചാലിപ്പുറം, മുഹമ്മദ് റാഫി പട്ടർപാലം, അബൂബക്കർ സഅദി നീലഗിരി, കബീർ കൊല്ലം എന്നിവർ സംസാരിച്ചു. ഇവരുടെ അമ്മ ലില്ലിയും ഭർത്താവ് രാജുവും ചടങ്ങിൽ സംബന്ധിച്ചു.