അന്താരാഷ്​ട്ര ഊർജ സമ്മേളനത്തിൽ ശ്രദ്ധേയനായി മലയാളി എൻജിനീയറിങ്​ വിദ്യാർഥി

റിയാദ്​: സൗദി തലസ്ഥാന നഗരി ആതിഥേയത്വം വഹിക്കുന്ന അന്താരാഷ്​ട്ര ഉൗർജ സമ്മേളനത്തിൽ ശ്രദ്ധേയനായി മലയാളി എൻജിനീയറിങ്​ വിദ്യാർഥി. റിയാദിലെ കിങ്​ അബ്​ദുല്ല പെട്രോളിയം സ്​റ്റഡീസ്​ ആൻഡ്​ റിസർച്ച്​ സെൻററിൽ സൗദി അസോസിയേഷൻ ഫോർ എനർജി എകണോമിക്​സി​െൻറ സഹകരണത്തോടെ ഈ മാസം നാലിന്​ ആരംഭിച്ച 44-ാമത്​​ അന്താരാഷ്​ട്ര സമ്മേളനത്തിൽ (ഐ.എ.ഇ.ഇ) പോസ്​റ്റർ അവതരണ വിഭാഗത്തിലാണ്​ വയനാട്​ കൽപറ്റ സ്വദേശിയും അഗർത്തല എൻ.ഐ.ടിയിൽ മൂന്നാം വർഷ കെമിക്കൽ എൻജിനീയറിങ്​ വിദ്യാർഥിയുമായ ജമീൽ ജംഹറിന്​ അവസരം ലഭിച്ചത്​.

ഊർജവുമായി ബന്ധപ്പെട്ട നിരവധി വിഷയങ്ങൾ ചർച്ച ചെയ്യുന്ന ആഗോള സമ്മേളനത്തിൽ കൺകറൻറ്​ സെഷനിലാണ്​ ​ജമീലി​െൻറ പോസ്​റ്റർ അവതരണമുണ്ടായിരുന്നത്​. നിശ്ചിത വിഷയങ്ങളിൽ തയാറാക്കിയ പോസ്​റ്ററുകൾ അവതരിപ്പിക്കുകയും അത്​ സംബന്ധിച്ച്​ സമ്മേളനത്തിൽ പ​ങ്കെടുക്കുന്നവർക്ക്​ വിശദീകരിച്ച്​ കൊടുക്കലുമായിരുന്നു ജമീലി​െൻറ ദൗത്യം.

ഈ അന്താരാഷ്​ട്ര സമ്മേളനത്തിൽ ആദ്യമായാണ്​ ബിരുദ വിദ്യാർഥിയായ ഒരു മലയാളിക്ക് സ്കോളർഷിപ്പോടുകൂടി അവസരം ലഭിക്കുന്നത്. റിയാദിലെ സ്വകാര്യ സ്ഥാപനത്തിൽ സീനിയർ അകൗണ്ടൻറായ ജംഹറി​െൻറയും ഷാജിതയുടെയും മകനാണ്​ ജമീൽ. ഹൈസ്​കൂൾ വരെ റിയാദിലെ മോഡേൺ സ്​കൂളിലാണ്​ ജമീൽ പഠിച്ചത്​. ശേഷം ഇന്ത്യയിലേക്ക്​ മടങ്ങി ഉപരിപഠനം നടത്തുകയാണ്​. ജമീലി​െൻറ മൂത്ത സഹോദരൻ ജാസിം റിയാദിലെ സ്വകാര്യ കമ്പനിയിൽ അക്കൗണ്ടൻറും മറ്റൊരു സഹോദരൻ ജസീൽ മൂന്നാം വർഷ സിവിൽ എൻജിനീയറിങ്​ വിദ്യാർഥിയുമാണ്.