മലയാളിയുടെ മൃതദേഹം രണ്ടര വര്‍ഷമായി ഖതീഫ് ആശുപത്രി മോര്‍ച്ചറിയില്‍

ദമ്മാം: രണ്ടര വര്‍ഷമായി മലയാളിയുടെ മൃതദേഹം ഖതീഫ് സെൻട്രൽ ആശുപത്രി മോര്‍ച്ചറിയില്‍. ഇത്രയും കാലത്തിനിടക്ക് ബന്ധുക്കളോ സുഹൃത്തുക്കളോ അന്വേഷിച്ച്​ എത്താതിനാല്‍ പൊലീസ് ദമ്മാമിൽ ഖബറടക്കാൻ ഒരുങ്ങുന്നതായാണ്​ വിവരം. കോയമൂച്ചി, കടവന്‍പയിക്കാട്ട്, പുവാട്ട് പറമ്പ, പറപ്പൂര്‍, കോഴിക്കോട് എന്നാണ് മൃതദേഹത്തി​​​​െൻറ പാസ്‌പോർട്ടിലുള്ള വിശദാംശങ്ങൾ. അൽഖോബാറില്‍ സൂപ്പര്‍മാര്‍ക്കറ്റ് നടത്തിവന്ന കോയമൂച്ചിയെ അസുഖത്തെ തുടര്‍ന്ന് 2015 ഡിസംബര്‍ 10 ന്​ അൽഖോബാര്‍ അല്‍ഫഹ്‌രി ആശുപത്രിയില്‍ പ്രവേശിപ്പിക്കുകയും അഞ്ചാം ദിവസം മരണപ്പെടുകയുമായിരുന്നു. മൃതദേഹം സൗദിയില്‍ ഖബറടക്കുന്നതിനോ നാട്ടിലേക്ക്​ അയക്കുന്നതിനോ വേണ്ടി സ്‌പോണ്‍സര്‍ മുന്നിട്ടിറങ്ങിയെങ്കിലും കുടുംബക്കാരുമായോ നാട്ടുകാരുമായോ ബന്ധപ്പെടാന്‍ കഴിഞ്ഞില്ല. തുടര്‍ന്ന് നടത്തിയ അന്വേഷണത്തിൽ ഇയാളുടെ പാസ്‌പോര്‍ട്ടിലെ വിവരം വ്യാജമാണെന്ന് തിരിച്ചറിഞ്ഞു.
 ജവാസാത്തില്‍ നിന്നും ശേഖരിച്ച വിവര പ്രകാരം 22 വര്‍ഷങ്ങൾക്ക്​ മുമ്പാണ് ഇയാള്‍ സൗദിയിലെത്തിയത്. 12 വര്‍ഷം മുമ്പാണ് ഇയാള്‍ ഏറ്റവും ഒടുവില്‍ റീ- എ​ൻട്രി വിസയില്‍ അവധിയില്‍ പോയതായി രേഖകളിലുള്ളത്. കോഴിക്കോട് ജില്ലക്കാരനാണെന്നാണ് പാസ്‌പോര്‍ട്ട് രേഖയിലുള്ളതെങ്കിലും ഇയാള്‍ കാസർകോട്​ സ്വദേശിയായാണ് അറിയപ്പെട്ടിരുന്നത്. കാസർകോട്ട്​ വിവിധ സ്ഥലങ്ങളില്‍ അന്വേഷണം നടത്തിയെങ്കിലും ഒരു വിവരവും ലഭിച്ചില്ല. ആറുമാസത്തോളം അൽരാജിഹ്​ ആശുപത്രിയില്‍ സൂക്ഷിച്ച മൃതദേഹം പിന്നീട് സാമൂഹിക പ്രവര്‍ത്തകന്‍ നാസ് വക്കം ഇടപെട്ട് ഖതീഫ് സെൻട്രൽ ആശുപത്രി മോര്‍ച്ചറിയിലേക്കു മാറ്റിയിരുന്നു. 

മാസങ്ങളായി മൃതദേഹം മോര്‍ച്ചറിയില്‍ സൂക്ഷിക്കേണ്ടി വരുന്നതിനാല്‍ ജീവനക്കാര്‍ക്കും മറ്റും കടുത്ത ആരോഗ്യ പ്രശ്‌നങ്ങള്‍ സൃഷ്​ടിക്കുമെന്നറിയിച്ച് ആശുപത്രി അധികൃതര്‍ പൊലീസിനെ അറിയിക്കുകയായിരുന്നു. മൃതദേഹം ഖബറടക്കാൻ വൈകുന്നതി​​​​െൻറ പേരില്‍ ഉത്തരവാദപ്പെട്ട സ്‌പോണ്‍സറുടെ കംപ്യൂട്ടര്‍ സേവനം തൊഴില്‍ മന്ത്രാലയം റദ്ദു ചെയ്തിരുന്നു. ഇതിനു മുമ്പും മാധ്യമങ്ങളില്‍ വിവരം നല്‍കിയിരുന്നെങ്കിലും ആരും അന്വേഷിച്ച് വന്നില്ല.
 ഇനിയും മൃതദേഹം സൂക്ഷിക്കാന്‍ സാധ്യമ​െല്ലന്നും 10 ദിവസത്തിനകം കോയമൂച്ചിയുടെ മൃതദേഹം സൗദിയില്‍ ഖബറടക്കണമെന്നുമാണ്​ പൊലീസി​​​​െൻറ ആവശ്യം. ഇദ്ദേഹത്തെ കുറിച്ച് എന്തെങ്കിലും വിവരം ലഭിക്കുന്നവര്‍ ഇന്ത്യന്‍ എംബസിയിലോ
 0569956848 എന്ന നമ്പറിലോ ബന്ധപ്പെടണമെന്ന്് നാസ് വക്കം അറിയിച്ചു.