മലപ്പുറം സ്വദേശി സൗദിയിൽ വാഹനാപകടത്തിൽ മരിച്ചു

മഹായിൽ(സൗദി അറേബ്യ): മലപ്പുറം മേലെ കാളികാവിലെ പരേതനായ ഉള്ളാട്ടിൽ അഹമ്മദ്ഹാജിയുടെ മകൻ അബ്ദുൽ റഷീദ് (32) സൗദിയിലെ മഹായിൽ വാഹന അപകടത്തിൽ മരിച്ചു. കമ്പനിയുടെ വാഹനം ഫിറ്റ്നസ്സ് ടെസ്റ്റിന് വേണ്ടി 200 കിലോമീറ്റർ അകലെ കിയാദിൽ നിന്നും മഹായിയിലേക്കു കൊണ്ട് വരുമ്പോൾ ഡിവൈഡറിൽ തട്ടി മറിഞ്ഞാണ് അപകടം.

രണ്ടു വർഷമായി സൗദിയിൽ ജോലി ചെയ്തു വരികയായിരുന്നു. 20 ദിവസം മുമ്പാണ് അവധി കഴിഞ്ഞ് നാട്ടിൽ നിന്നെത്തിയത്.

മാതാവ് റുഖിയ, ഭാര്യ: ബിൻസി, ഏക മകൾ ഫിദ ഫാത്തിമ (ഒന്നര വയസ്), മൊയ്‌തീൻ, അസ്സയിനാർ, അബ്ദുൽ ലത്തീഫ്, യൂസഫ് , അലിയാർ,
ഉസ്മാൻ, ശിഹാബുദ്ദീൻ, ഖദീജ, സൈനബ, സുബൈദ,റസീന, ജുമാനത്ത്, ഹഫ്സത്ത്, റഹ്മത്ത്, ബുഷ്‌റ എന്നിവർ സഹോദരങ്ങളാണ്.

മയ്യിത്ത് മഹായിലിൽ സംസ്കരിക്കുന്നതിനാവശ്യമായ നടപടി പുരോഗമിക്കുകയാണ്. ബന്ധുക്കൾ റിയാദിൽ നിന്ന് മഹായിലിൽ എത്തിയിട്ടുണ്ട്.