മദീനയാത്ര: 20 ഒാളം മലയാളി ഹാജിമാർ രണ്ടാം ദിനവും ദുരിതത്തിലായി

മക്ക: ഹജ്ജ്​ സേവന കമ്പനിയുടെ അനാസ്​ഥ കാരണം മദീന സന്ദർശനത്തിന്​ പുറപ്പെട്ട 20 ഒാളം മലയാളി ഹാജിമാർ ചൊവ്വാഴ്​ചയും ദുരിതത്തിലായി. മതിയായ വാഹനസൗകര്യം ലഭിക്കാതെ സ്​ത്രീകളുൾപെടെ തീർഥാടകർ പെരുവഴിയിൽ കഴിയേണ്ടി വന്നു. തിങ്കളാഴ്​ച പുലർച്ചെ മുതൽ മദീന സന്ദർശനത്തിന്​ ഒരുങ്ങി കാത്തിരിക്കുന്ന ഹാജിമാരെ ചൊവ്വാഴ്​ച രാവിലെ ചെറിയ വാനിൽ കൊണ്ടുപോകാൻ ശ്രമിച്ചതാണ്​ യാത്ര മുടക്കിയത്​. ഇൗ വാഹനത്തിൽ 450 കിലോമീറ്റർ ദൂരം സഞ്ചരിക്കാനാവില്ലെന്ന്​ ചൂണ്ടിക്കാട്ടി ഹാജിമാർ പിൻവാങ്ങി. 

പിന്നീട്​ സൗദി സമയം ഉച്ചക്ക്​​ രണ്ട്​ മണി വരെ വാഹനം കാത്ത്​ ഇവർ തെരുവിൽ അലയേണ്ടി വന്നു. മക്കയിലെ ഹോട്ടലിൽ നിന്ന്​ ഒഴിയേണ്ട സമയം കഴിഞ്ഞതിനാൽ  റോഡിൽ കഴിയുകയെ ഇവർക്ക്​ നിർവാഹമുണ്ടായിരുന്നുള്ളൂ​. ഹജ്ജ്​സേവന കമ്പനിയുമായി ഉണ്ടാക്കിയ കരാർ പ്രകാരം മികച്ച ബസ്​ സൗകര്യം ഹാജിമാർക്ക്​ അവകാശപ്പെട്ടതാണെന്ന​ും ദുരിതം സഹിച്ച്​ ചെറിയ വാഹനത്തിൽ പോകേണ്ടതില്ലെന്നും ഇന്ത്യൻ ഹജ്ജ്​മിഷനും നിലപാടെടുത്തു. 

ഒടുവിൽ രണ്ട്​ മണിയോടെ ബസ്​ എത്തിയ ശേഷമാണ്​ ഹാജിമാർ യാത്ര പുറപ്പെട്ടത്​. സൗദിയിലെ ഹജ്ജ്​ സേവന കമ്പനിയാണ്​  ഇൗ വിഷയത്തിൽ നടപടി സ്വീകരിക്കേണ്ടത്​. മദീനയിലെ താമസ സൗകര്യവുമായി ബന്ധപ്പെട്ട സാ​േങ്കതിക പ്രശ്​നമുള്ളതിനാൽ 300  ഒാളം ഹാജിമാരുടെ മദീനയാത്ര​ തിങ്കളാഴ്​ച മുടങ്ങിയിരുന്നു. ഒരു ദിവസം മുഴുവൻ കാത്തിരുന്നിട്ടും ഫലമുണ്ടായില്ല. ഒടുവിൽ ചൊവ്വാഴ്​ച രാവിലെയാണ്​ ഹാജിമാരെ കൊണ്ടു പോയത്​. ഇൗ കൂട്ടത്തിൽ​െപട്ട 20 ഒാളം ഹാജിമാരാണ്​ രണ്ടാം ദിവസവും ദുരിതമനുഭവിച്ചത്​​. അതേ സമയം നേരത്തെ നിശ്​ചയിച്ച പ്രകാരം 900ത്തോളം ഹാജിമാർ ഇന്നലെ മദീനയിലേക്ക്​ പുറപ്പെട്ടു.