‘നിയോം സിറ്റി’ രാജ്യത്തെ വൈവിധ്യവത്കരണത്തിലേക്ക് നയിക്കും -എം.എ യൂസുഫലി

റിയാദ്: സൗദി കിരീടാവകാശി അമീർ മുഹമ്മദ് ബിൻ സൽമാൻ പ്രഖ്യാപിച്ച 50,000 കോടി ഡോളറി​​െൻറ ‘നിയോം’ മെഗാസിറ്റി പദ്ധതി സൗദി സമ്പദ് ഘടനയെ വൈവിധ്യവൽക്കരണത്തിലേക്ക്​ നയിക്കുമെന്ന് പ്രമുഖ വ്യവസായിയും ലുലു ഗ്രൂപ്​ ചെയർമാനുമായ എം.എ യൂസുഫലി പറഞ്ഞു. സൗദി ജനറൽ ഇൻവെസ്​റ്റുമ​െൻറ്​ അതോറിറ്റി (സാഗിയ) ഗവർണർ ഇബ്രാഹിം അൽഉമറുമായി റിയാദിൽ നടന്ന കൂടിക്കാഴ്​ചക്ക്​ ശേഷം പുറത്തുവിട്ട വാർത്താക്കുറിപ്പിൽ ലുലു ഗ്രൂപ്പി​​െൻറ വികസന പദ്ധതികൾ സംബന്ധിച്ച്​ വിശദമായ ചർച്ച നടത്തിയതായും വിശദീകരിച്ചു. ആഗോള നിക്ഷേപകരുടെ സംഗമ ഭൂമിയായിരിക്കും ഇനി സൗദിയെന്നും അദ്ദേഹം പറഞ്ഞു. പുത്തൻ വ്യവസായ സംരഭങ്ങൾ വരുന്നതോടുകൂടി രാജ്യം അതിവേഗം സാമ്പത്തിക വളർച്ച കൈവരിക്കും. കൂടുതൽ തൊഴിലവസരങ്ങൾ സൃഷ്​ടിക്കുന്നതിനും ഉൽപാദനശേഷി വർധിപ്പിക്കുന്നതിനും ഇത് ഏറെ സഹായിക്കും.

ദീർഘവീക്ഷണത്തോടുകൂടിയുള്ള ഈ പ്രഖ്യാപനം വാണിജ്യ വ്യവസായ ഒരു പുത്തനുണർവ് ഉണ്ടാക്കിയിട്ടുണ്ട്. ലുലു ഗ്രൂപ്​ സൗദിയിൽ ഇതുവരെയായി ഒരു ബില്യൺ റിയാൽ മുതൽ മുടക്കിയിട്ടുണ്ടെന്നും യൂസുഫലി അറിയിച്ചു. അടുത്ത രണ്ട്​ വർഷത്തിനുള്ളിൽ 500 മില്യൺ റിയാൽ ലുലുവി​​െൻറ പ്രവർത്തനം വ്യാപിപ്പിക്കുന്നതിനായി രാജ്യത്ത് നിക്ഷേപിക്കും. ഈ കാലയളവിൽ 12 പുതിയ ഹൈപർമാർക്കറ്റുകളാണ് സൗദിയുടെ വിവിധ നഗരങ്ങളിൽ പ്രവർത്തനമാരംഭിക്കുന്നത്. 3,000 സൗദികൾക്ക്​ ഇതിലൂടെ തൊഴിൽ നൽകും. പുതിയ ഹൈപർമാർക്കറ്റുകൾ പ്രവർത്തനമരംഭിക്കുന്നതോടു കൂടി സ്വദേശി ​ജീവനക്കാരുടെ എണ്ണം 5,000 അകുമെന്നും യൂസുഫലി പറഞ്ഞു. നിലവിൽ 10 ഹൈപർമാർക്കറ്റുകളും എട്ട്​ അരാംകോ ഒൗട്ടുലെറ്റുകളും രാജ്യത്ത് പ്രവർത്തിക്കുന്നുണ്ട്.

കഴിഞ്ഞ മൂന്ന്​ വർഷമായിട്ട് അരാംകോയുടെ റീട്ടെയിൽ നടത്തിപ്പ്​ ചുമതല ഏറ്റെടുത്തു നടത്തുന്നു. സൗദിയിലെ ആതുരശുശ്രൂഷ രംഗത്ത്​ നിക്ഷേപം നടത്താൻ ഗവർണറുടെ ക്ഷണം ലഭിച്ചിട്ടുണ്ട്. സൗദിയിലെ റിയൽ എസ്​റ്റേറ്റ് മേഖലയിൽ മുതൽ മുടക്കുന്നതിനായുള്ള ‘സാഗിയ’യുടെ പ്രത്യേക നിക്ഷേപക ലൈസൻസ്​ ലഭിച്ചതായും യൂസുഫലി അറിയിച്ചു. റിയാദിൽ നടന്ന ആഗോള നിക്ഷേപക സംഗമത്തിൽ പങ്കെടുക്കുന്നതിനിടയിലാണ് സാഗിയ ഗവർണറുമായി യൂസുഫലി കൂടിക്കാഴ്ച നടത്തിയത്. ലുലു സൗദി റീജനൽ ഡയറക്ടർ ഷെഹിം മുഹമ്മദും കൂടിക്കാഴ്​ചയിൽ പ​െങ്കടുത്തു.