ലുലു ജി.സി.സിയിലെ ഏറ്റവും മികച്ച ഷോപ്പിങ് ലക്ഷ്യസ്ഥാനം -സൗദി വ്യവസായ മന്ത്രി
text_fieldsറിയാദ്: ലുലു ജി.സി.സിയിലെ ഏറ്റവും മികച്ച ഷോപ്പിങ് ലക്ഷ്യസ്ഥാനമാണെന്ന് സൗദി വ്യവസായ, ധാതുവിഭവ മന്ത്രി എൻജി. ബന്ദർ ബിൻ ഇബ്രാഹിം അൽഖൊറൈഫ് പറഞ്ഞു. ലുലു ഹൈപർമാർക്കറ്റിൽ പ്രത്യേകം അണിനിരത്തിയ സൗദി ഉൽപന്നങ്ങൾ കാണാൻ റിയാദിലെ അത്യാഫ് മാളിലെത്തിയതായിരുന്നു മന്ത്രി.
ലുലു ഹൈപർമാർക്കറ്റുകളും ചെയർമാനും മാനേജിങ് ഡയറക്ടറുമായ എം.എ. യൂസുഫലിയും സൗദി ഉൽപന്നങ്ങൾക്ക് നൽകുന്ന പിന്തുണയെ എടുത്തുപറഞ്ഞ് പ്രശംസിച്ച മന്ത്രി, ലുലുവിന്റെ വെയർഹൗസിന് സൗജന്യ ഭൂമിയും ലോജിസ്റ്റിക്സിന് ആവശ്യമായ മുഴുവൻ പിന്തുണയും വാഗ്ദാനം ചെയ്തു. ലുലുവിൽ സൗദി ഉൽപന്നങ്ങൾ പ്രദർശിപ്പിച്ചിരിക്കുന്ന ഭാഗങ്ങൾ സന്ദർശിച്ച മന്ത്രി ഇവിടെ മണിക്കൂറുകളോളം ചെലവഴിച്ചു. ശേഷം ഔദ്യോഗിക ട്വിറ്റർ ഹാൻഡിലിൽ ലുലുവിൽനിന്നെടുത്ത ചിത്രങ്ങൾ പോസ്റ്റ് ചെയ്തു. ലുലുവിനെ പ്രശംസിക്കുന്ന ട്വീറ്റും പോസ്റ്റ് ചെയ്തു.
മന്ത്രിയെ ലുലു സൗദി മാനേജ്മെന്റും സൗദി ജീവനക്കാരും ചേർന്ന് ഊഷ്മളമായി വരവേറ്റു. കാർഷികോൽപന്നങ്ങൾ ഉൾപ്പടെ സൗദി നിർമിത നിത്യോപയോഗ വസ്തുക്കൾ ഹൈപർമാർക്കറ്റുകളിലും സ്റ്റോറുകളിലും അണിനിരത്തിയ ലുലു വിപണിയിൽ ആഭ്യന്തര ഉൽപന്നങ്ങളുടെ സാന്നിധ്യം സജീവമാക്കി നിർത്തുന്ന കാര്യത്തിൽ പ്രതിജ്ഞാബദ്ധമാണെന്ന് വാർത്താക്കുറിപ്പിൽ വ്യക്തമാക്കി.
ഈത്തപ്പഴം, സൗദി കോഫി, ചെങ്കടൽ മത്സ്യവിഭവം, ആട്, മാട് ഇറച്ചികൾ, പഴം പച്ചക്കറി വർഗങ്ങൾ തുടങ്ങി ഭക്ഷണ, ഭക്ഷ്യേതര ഇനങ്ങളിലായി 1,200 സൗദി ഉൽപന്നങ്ങൾ ലുലു ഹൈപർമാർക്കറ്റുകളിൽ അണിനിരത്തിയിട്ടുണ്ട്. വിപണിയിലെ കരിഞ്ചന്തയും പൂഴ്ത്തിവെപ്പും ഒഴിവാക്കി മുട്ടകൾ നേരിട്ട് എത്തിക്കാനായി അടുത്തിടെ ലുലു ഗ്രൂപ്പും സൗദി മുട്ട ഉൽപാദക അസോസിയേഷനും തമ്മിൽ ധാരണാപത്രം ഒപ്പുവെച്ചിരുന്നു.
വിഷൻ 2030ന്റെ ലക്ഷ്യങ്ങൾ കൈവരിക്കുന്നതിൽ പങ്കുവഹിക്കാൻ സൗദി എക്സ്പോർട്ട് ഡെവലപ്മെന്റ് അതോറിറ്റിയും നാഷനൽ ഇൻഡസ്ട്രിയൽ ഡെവലപ്മെന്റും ചേർന്ന് ആരംഭിച്ച ദേശീയ സംരംഭമായ 'സൗദി മെയ്ഡ് പ്രോഗ്രാമി'ൽ പങ്കാളിയായാണ് സൗദി ഉൽപന്നങ്ങൾ പ്രോത്സാഹിപ്പിക്കുന്ന ലുലു നടപടി.
സ്റ്റോറുകൾ തദ്ദേശീയ പാരമ്പര്യ ഡിസൈനുകളാൽ പ്രത്യേകം അലങ്കരിച്ചാണ് സൗദി ഉൽപന്നങ്ങൾ വിപുലമായി അണിനിരത്തിയതെന്നും വാർത്താക്കുറിപ്പിൽ അറിയിച്ചു. ഏറെ അഭിമാനത്തോടെയാണ് ലുലുവിൽ പ്രത്യേക സൗകര്യമൊരുക്കി സൗദി ഉൽപന്നങ്ങൾ പ്രദർശിപ്പിക്കുന്നതെന്ന് ലുലു സൗദി ഡയറക്ടർ ഷെഹീം മുഹമ്മദ് പറഞ്ഞു. ഭക്ഷ്യസുസ്ഥിരതക്കും പ്രാദേശിക കാർഷികവിപണിയുടെ അഭിവൃദ്ധിക്കും ഒപ്പം സൗദി ഭരണനേതൃത്വത്തിന്റെ ദീർഘദർശനത്തോടെയുള്ള സമഗ്രഹ വികസന പരിപാടി വിഷൻ 2030ന്റെ ലക്ഷ്യപ്രാപ്തിക്കും വേണ്ടി ഈ പ്രവർത്തനങ്ങളിലൂടെ ലുലു പങ്കാളിത്തം വഹിക്കുകയാണെന്നും ഷെഹീം മുഹമ്മദ് കൂട്ടിച്ചേർത്തു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.