ലെവി പേടിച്ച്​ പോയ കുടുംബങ്ങളിലധികവും സന്ദർശക വിസയിൽ സൗദിയിലെത്തുന്നു

റിയാദ്​: ആശ്രിത വിസക്ക്​ സൗദി അറേബ്യ ലെവി ചുമത്തുകയും നിരക്ക്​ വർഷാവർഷം വർധിപ്പിക്കുകയും ചെയ്​തതോടെ തിരിച്ചുപോയ പ്രവാസി കുടുംബങ്ങളിലധികവും സന്ദർശക വിസയിൽ തിരിച്ചെത്തുന്നു. സന്ദർശക വിസ ഫീസ്​ കുറച്ചതിന്​ ശേഷം സ്​റ്റാമ്പിങ്ങിനെത്തുന്ന പാസ്​പോർട്ടുകളുടെ എണ്ണം അഞ്ചിരട്ടി വർധിച്ചെന്ന്​ ഇന്ത്യയിലെ ട്രാവൽ ഏജൻസി വൃത്തങ്ങൾ വെളിപ്പെടുത്തുന്നു. 2017 ജ​ൂലൈയിൽ പ്രതിമാസ ആശ്രിത ലെവി നടപ്പായത്​ മുതലാണ്​ വിദേശി കുടുംബങ്ങൾ മടങ്ങാൻ തുടങ്ങിയത്​. ഇൗ വർഷം ഫീസ്​ വീണ്ടും കൂടിയതോടെ നിൽക്കകള്ളിയില്ലാതായി ഭൂരിപക്ഷത്തിനും. സ്​കൂൾ അവധിക്കാലമെത്താനുള്ള കാത്തുനിൽപായിരുന്നു. ജൂണിൽ അവധി തുടങ്ങിയപ്പോഴേക്കും മിക്കവരും കുട്ടികളുടെ ടി.സിയും വാങ്ങി നാട്ടിലേക്ക്​ മടങ്ങി. 

അതിന്​ തൊട്ടുമുമ്പാണ്​ സന്ദർശക വിസയുടെ ഫീസ്​ കുത്തനെ കുറച്ചെന്ന സന്തോഷവാർത്ത എത്തിയത്​. മേയ്​ രണ്ട്​ മുതൽ ഫീസിളവ്​ നടപ്പായി​. നിരാശയുടെ ഇരുട്ടിൽ കുടുംബങ്ങൾക്കത് പ്രത്യാശയുടെ വെളിച്ചമായി​. തിരിച്ചെത്താൻ വഴി തെളിഞ്ഞല്ലോ എന്ന ആശ്വാസവുമായാണ്​ പലരും മടങ്ങിയത്​. ഗൾഫ്​ നാടുകളിലെ സ്വദേശിവത്​കരണം മൂലം വിദേശ റിക്രൂട്ടിങ്​ കുറഞ്ഞ്​ മാന്ദ്യത്തിലായ ട്രാവൽ ഏജൻസികൾക്കും അതുണർവേകുന്നതായിരുന്നു. ഇപ്പോൾ ഏജൻസികളിലെത്തുന്ന പാസ്​പോർട്ടുകളിൽ അധികവും സന്ദർശക വിസാ സ്​റ്റാമ്പിങ്ങിനുവേണ്ടിയുള്ളതാണെന്ന്​ വെളിപ്പെടുത്തുന്നതും ആ രംഗത്തുള്ളവർ തന്നെയാണ്​.

2016 ആഗസ്​റ്റിൽ ഫീസ്​ കുത്തനെ കൂട്ടിയ ശേഷം സന്ദർശക വിസാ സ്​റ്റാമ്പിങ്​ 20 ശതമാനമായി കുറഞ്ഞിരുന്നു​​. അതാണിപ്പോൾ അഞ്ചിരട്ടിയായി വർധിച്ചത്​. ആദ്യകാലത്ത്​ പാസ്​പോർട്ട്​ ഒന്നിന്​ 6,000 രൂപയായിരുന്നു വിസ സ്​റ്റാമ്പിങ്​ ചെലവ്​. സ്​റ്റാമ്പ്​ ഫീ 200 റിയാലിൽ നിന്ന്​ 2,000 ആയി ഉയർത്തിയപ്പോൾ ഇൻഷുറൻസും സർവീസ്​ ചാർജുമടക്കം അത്​ ഇന്ത്യയിൽ 42,000 രൂപയായി കുത്തനെയുയർന്നു. അതോടെ സന്ദർശക വിസയെ ആളുകൾ അവഗണിച്ചു. ഇപ്പോൾ 9,500 രൂപയായി കുറഞ്ഞതാണ്​ വീണ്ടും ആളുകളെ അതിലേക്കാകർഷിക്കുന്നത്​. ഒരു തവണ വന്നാൽ ആറുമാസം വരെ നിൽക്കാം. വീണ്ടും വിസയെടുത്ത്​ വന്ന്​ ആറുമാസം കൂടി നിന്നാലും സ്ഥിരം കുടുംബ വിസക്ക്​ ചുമത്തിയ ലെവിയുമായി താരതമ്യം ചെയ്യു​േമ്പാൾ ലാഭകരം സന്ദർശക വിസയാണ്. 

സ്​കൂൾ അവധിക്കാലം കഴിയുന്ന സെപ്​റ്റംബറോടെ അധികം പേരും ഇൗ രീതിയിൽ തിരിച്ചെത്തും. അതിന​ുമുന്നോടിയായുള്ള തിരക്കാണ്​ ട്രാവൽ ഏജൻസികളിൽ അനുഭവപ്പെടുന്നത്​. വിമാന കമ്പനികൾക്കും സൗദിയിലെ വാണിജ്യ സ്ഥാപനങ്ങൾക്കുമെല്ലാം ഗുണകരമാണ്​ വിദേശി ആശ്രിതരുടെ ഇൗ രീതിയിലുള്ള വരവുപോക്കുകൾ.