നിയമമന്ത്രാലയത്തിന്​ കീഴിൽ തൊഴിൽ കോടതികൾ ആരംഭിക്കുന്നു

ജിദ്ദ: സൗദി അറേബ്യയിൽ നിയമമന്ത്രാലയത്തിന്​ കീഴിൽ പുതിയ തൊഴിൽ കോടതികൾ ആരംഭിക്കുന്നു.  2019 തുടക്കത്തിൽ ഇവ പ്രവർത്തിച്ചുതുടങ്ങും. കോടതികൾ സ്​ഥാപിക്കുന്നതിനുള്ള നടപടികൾ പുരോഗമിക്കുകയാണെന്നും​ പ്രത്യേക ജഡ്​ജിമാരുടെ പരിശീലനം അവസാനഘട്ടത്തിലാണെന്നും നിയമമന്ത്രാലയം അറിയിച്ചു. ജീവനക്കാരുടെ നിയമനവും നടക്കുന്നുണ്ട്​. കോടതി മന്ദിരങ്ങൾ എല്ലാ സൗകര്യങ്ങളോടും കൂടിയതാകുമെന്നും ഡിജിറ്റൽ സേവനത്തിന്​ ഉതകുന്ന തരത്തിൽ ഇവയൊക്കെ ക്രമീകരിക്കുമെന്നും വ്യക്​തമാക്കി. നിലവിൽ ജുഡീഷ്യൽ സ്വഭാവമുള്ള തൊഴിൽ തർക്ക പരിഹാര സംവിധാനം മാത്രമാണ്​ തൊഴിൽ കാര്യാലയങ്ങളിൽ ഉണ്ടായിരുന്നത്​. 

രാജ്യത്തെ തൊഴിൽ വിപണി പുനഃസംവിധാനിക്കുന്നതി​​​െൻറയും ആധുനികവത്​കരിക്കുന്നതി​​​െൻറയും ഭാഗമാണ്​ ഇൗ മാറ്റങ്ങൾ. ആത്യന്തികമായി ഇതുവഴി രാജ്യത്തെ നിക്ഷേപം വർധിക്കുകയും സമ്പദ്​ഘടന വിഷൻ 2030​​​െൻറ ഉദ്ദേശലക്ഷ്യങ്ങളിലേക്ക്​ ഉയരുകയും ചെയ്യുമെന്ന്​ പ്രതീക്ഷിക്കപ്പെടുന്നു. 
2018 ആദ്യ ത്രൈമാസത്തിലെ കണക്കുകൾ പ്രകാരം സൗദി അറേബ്യയിൽ ഏകദേശം 1.30 കോടി തൊഴിലാളികളുണ്ട്​. ഇതിൽ ഒരുകോടിയും വിദേശികളാണ്​. 30 ലക്ഷം തദ്ദേശീയരും. രാജ്യത്ത്​ അടുത്തിടെ പ്രഖ്യാപിക്കപ്പെട്ടതും പുരോഗമിക്കുന്നതുമായ മെഗാ പദ്ധതികളിൽ വൻതോതിൽ തൊഴിലാളികളെ ആവശ്യം വരുന്നതിനാൽ ഇൗ സംഖ്യ ഗണ്യമായി ഉയരുമെന്നും കരുതപ്പെടുന്നു. 

പദ്ധതികളുടെ നടത്തിപ്പ്​ അനായാസമാക്കുന്നതിന്​ സർവ സജ്ജമായ തൊഴിൽകോടതികൾ ഉപകരിക്കും. കൃത്യമായി നിർവചിക്കപ്പെടുന്ന തൊഴിൽ സാഹചര്യങ്ങൾക്കും കരാറുകൾക്കും ഉള്ളിൽ ഇൗ മേഖല എത്തുന്നതോടെ തൊഴിലാളികൾക്കും തൊഴിൽ ദാതാക്കൾക്കും അത്​ ഏറെ ഗുണം ചെയ്യും. തർക്കങ്ങളും പരാതികളും കാര്യക്ഷമമായും സമയബന്ധിതമായും പരിഹരിക്കപ്പെടും. തൊഴിലുമായി ബന്ധപ്പെട്ട എല്ലാ സർക്കാർ സംവിധാനങ്ങളും പുതിയ കോടതിയുമായി ബന്ധപ്പെടുത്തും. 

പ്രവർത്തന പദ്ധതി തയാറാക്കുന്നതിനായി കഴിഞ്ഞ കുറേവർഷത്തെ തൊഴിൽ തർക്ക കേസുകൾ പഠിച്ചുവരികയാണെന്നും മന്ത്രാലയം വ്യക്​തമാക്കി. നാലുപ്രധാന ലക്ഷ്യങ്ങൾ കൈവരിക്കാനാണ്​ ശ്രമിക്കുന്നത്​. നിക്ഷേപ സാധ്യതകൾ വർധിപ്പിക്കുക, തൊഴിൽ മികവ്​ വർധിപ്പിക്കുക, തൊഴിൽ നിയമ വ്യവഹാരങ്ങൾ വേഗത്തിലാക്കുക, കോടതികളിലെ വിപുലമായ വിവരശേഖരം ഉപയോഗപ്പെടുത്തുക എന്നിവയാണവ.