കെ.എം.സി.സി സൗദി നാഷനൽ കമ്മിറ്റി തെരഞ്ഞെടുപ്പ്​ കീറാമുട്ടിയായി തുടരും

ജിദ്ദ: നാഷനൽ കമ്മിറ്റി കാലാവധി അനന്തമായി നീളുന്നു എന്ന പരാതിക്കിടെ സൗദി കെ.എം.സി.സി ഭാരവാഹി പ്രഖ്യാപനം ഡിസംബർ ആറിന്​ പാണക്കാട്ട്​ നടക്കും. ആറാം തിയതി നടക്കുന്ന മുസ്​ലീം ലീഗി​​െൻറ ഉന്നതാധികാര സമിതി യോഗത്തിലാവും പ്രഖ്യാപനം. കെ.പി മുഹമ്മദ്​ കുട്ടിയുടെ നേതൃത്വത്തിലുള്ള നിലവിലെ കമ്മിറ്റി ഒരു വർഷം കൂടി അഡ്​ഹോക്​ കമ്മിറ്റിയായി തുടരുമെന്നാണ്​ വ്യക്​തമായ സൂചന. കൗൺസിൽ വിളിച്ചുകൂട്ടി ജനാധിപത്യപരമായ രീതിയിൽ തെരഞ്ഞെടുപ്പ്​ നടത്തി ഭാരവാഹികളെ കണ്ടെത്തണമെന്ന്​ ശക്​തമായ അഭിപ്രായം ഉയരുന്നുണ്ടെങ്കിലും നിലവിലെ കമ്മിറ്റിയുടെ ക്ഷേമ പദ്ധതികളുടെ പൂർത്തീകരണം ചൂണ്ടിക്കാട്ടിയാണ്​ അഭിപ്രായവ്യത്യാസമുള്ളവരെ അടക്കി നിർത്തുന്നത്​.
ഇതിന്​ മുമ്പ്​ പല പൊട്ടിത്തെറികളും സംഘടനക്കകത്തും പുറത്തും ഇതി​​െൻറ പേരിൽ ഉയർന്നിരുന്നെങ്കിലും അവയെ അതിജയിച്ച്​ മുസ്​ലീം ലീഗ്​ ഉന്നത നേതൃത്വത്തെ കൂടെ നിർത്താൻ കെ.പി മുഹമ്മദ്​ കുട്ടിയുടെ അധ്യക്ഷതയിലുള്ള കമ്മിറ്റിക്ക്​ സാധിച്ചിരുന്നു. കുഞ്ഞാലിക്കുട്ടി ഉൾപ്പെടെ നേതാക്കൾ സൗദിയിൽ വന്ന്​ പ്രശ്​ന പരിഹാരത്തിന്​ വേണ്ടി നടത്തിയ ചർച്ചകൾ പോലും എവിടെയുമെത്താതെ പോവുകയായിരുന്നു. 2017 മെയ്​ മാസം ജിദ്ദ സെൻട്രൽ കമ്മിറ്റിയിൽ നടന്ന സംഘട്ടനത്തി​​െൻറ കാരണം പോലും നാഷനൽ കമ്മിറ്റി തെരഞ്ഞെടുപ്പിലേക്ക്​ നീളുന്നതായിരുന്നു.
മൂന്ന്​ വർഷം കാലാവധിയുള്ള നാഷനൽ കമ്മിറ്റി ആറ്​ വർഷം കഴിഞ്ഞിട്ടും തെരഞ്ഞെടുപ്പ്​ നടത്തുകയോ പുതിയ ഭാരവാഹികളെ തെരഞ്ഞെടുക്കുകയോ ചെയ്യുന്നില്ല എന്നതാണ്​ വിവിധ സെൻട്രൽ കമ്മിറ്റികളുടെ ഭാഗത്ത്​ നിന്നുയർന്ന പരാതി. സംഘടനക്കകത്തെ ഗ്രൂപ്പിസം ശക്​തമാണെങ്കിലും നിലവിലെ കമ്മിറ്റിയെ സമ്മർദത്തിലൂടെ മാറ്റാനുള്ള ശ്രമങ്ങളൊന്നും വിജയിച്ചില്ല. വിഷയം പഠിക്കാൻ അബ്​ദുറഹ്​മാൻ കല്ലായി സൗദിയിൽ വന്ന്​ സംസ്​ഥാനനേതൃത്വത്തിന്​ റിപ്പോർട്ട്​ നൽകിയെങ്കിലും നാഷനൽ കമ്മിറ്റിയിൽ തെരഞ്ഞെടുപ്പ്​ നടത്തുന്ന അവസ്​ഥയിലേക്ക്​ കാര്യങ്ങൾ എത്തിയില്ല.
തെരഞ്ഞെടുപ്പിലൂടെ നാഷനൽ കമ്മിറ്റിയെ കണ്ടെത്തണം, കമ്മിറ്റിയുടെ വരവ്​ ചെലവ്​ കണക്ക്​ കൗൺസിൽ മുമ്പാകെ അവതരിപ്പിക്കണം, ഒാരോ സെൻട്രൽ കമ്മിറ്റികൾക്കും അതി​​െൻറ പകർപ്പ്​ എത്തിക്കണം തുടങ്ങിയ വിഷയങ്ങൾ സെൻട്രൽ കമ്മിറ്റികൾ രേഖാമൂലം അബ്​ദുറഹ്​മാൻ കല്ലായിക്ക്​ സമർപ്പിച്ചിരുന്നു. എന്നാൽ ഇൗ വിഷയങ്ങളിലൊന്നിലും നടപടികളുണ്ടായില്ല എന്നാണ്​ പരാതി. സൗദിയിലെ ഏറ്റവും വലിയ ജില്ലാകമ്മിറ്റിയായ മലപ്പുറം കമ്മിറ്റി കഴിഞ്ഞ മാസം ജനാധിപത്യരീതിയിൽ തെരഞ്ഞെടുപ്പ്​ നടത്തി മാതൃക കാണിച്ചത്​ നേതൃത്വത്തിന്​ സൂചനയായിരുന്നു. തെരഞ്ഞെടുപ്പ്​ വേണമെന്നാണ്​ സംഘടനക്കുള്ളിലെ ശക്​തമായ മുറവിളി. എന്നാൽ അജ്ഞാത കാരണങ്ങളാൽ മുസ്​ലീം ലീഗ്​ സംസ്​ഥാന നേതൃത്വം നിലവിലെ കമ്മിറ്റിയെ തൊടാൻ ധൈര്യപ്പെടുന്നില്ല എന്ന്​ സംഘടനാവൃത്തങ്ങൾ സമ്മതിക്കുന്നു.
ഫണ്ടി​​െൻറ കാര്യത്തിലുൾപെടെ ജി.സി.സി രാജ്യങ്ങളിലെ ഏറ്റവും വലിയ കമ്മിറ്റിയാണ്​ സൗദിയിലേത്​. മെമ്പർഷിപ്പ്​ കാമ്പയിൻ ആരംഭിക്കാനിരിക്കെയാണ് നാഷനൽ കമ്മിറ്റിക്ക്​ അഡ്​ഹോക്​ കമ്മിറ്റി വരാൻ പോവുന്നത്​. ഇത്​ സംഘടനക്കകത്ത്​ വലിയ പൊട്ടിത്തെറിയുണ്ടാക്കുമെന്ന്​ ഒരു വിഭാഗം പറയുന്നുണ്ടെങ്കിലും പാണക്കാട്ട്​ നിന്ന്​ പ്രഖ്യാപനം വന്നാൽ പിന്നെ വലിയ പ്രതിഷേധത്തിനൊന്നും സാധ്യതയില്ലെന്നാണ്​ വിലയിരുത്തൽ.​ മാത്രമല്ല കുടുംബ സുരക്ഷാ പദ്ധതിയുടെ ഭാഗമായി മൂന്ന്​ കോടിയോളം രൂപയുടെ വിതരണം ഡിസംബർ ആറിന്​ പാണക്കാട്​ ഹാദിയ ഒാഡിറ്റോറിയത്തിൽ നടക്കും. ഇതോടെ ഇതു സംബന്ധിച്ചുള്ള പരാതികളും തീരുമെന്നാണ്​ കണക്ക്​ കൂട്ടൽ. എന്നാലും എന്തുകൊണ്ട്​ തെരഞ്ഞെടുപ്പില്ല എന്ന വിഷയം സംഘടനക്കകത്ത്​ കീറാമുട്ടിയായി തുടരും.