കെ.എം.സി.സി വളണ്ടിയർമാർ 14 മുതൽ സേവനത്തിന് 

ജിദ്ദ: ഡൽഹിയിൽ നിന്നുള്ള ഹാജിമാരുമായി ഇന്ത്യയുടെ ആദ്യഹജ്ജ്  വിമാനം ജൂലൈ 14ന് മദീനയിൽ എതുന്നത് മുതൽ ഈ വർഷത്തെ സൗദി കെ.എം.സി.സി ഹജ്ജ് വളണ്ടിയർമാരുടെ സേവന പ്രവർത്തനങ്ങൾക്ക് തുടക്കം കുറിക്കുമെന്ന്  ഭാരവാഹികൾ അറിയിച്ചു. ജൂലൈ 16 മുതൽ  മക്കയിലും ജൂലൈ 29 മുതൽ ജിദ്ദ ഹജ്ജ് ടെർമിനലിലും കെ.എം.സി.സി വളണ്ടിയർമാർ സേവനത്തിനുണ്ടാവുമെന്നും കോൺസുൽ ജനറൽ മുഹമ്മദ്‌ നൂർ റഹ്​മാൻ ശൈഖുമായി ജിദ്ദ ഇന്ത്യൻ കോൺസുലേറ്റിൽ നടന്ന കൂടിക്കാഴ്ചക്ക് ശേഷം കെ.എം.സി.സി നേതാക്കൾ അറിയിച്ചു. 

ഹാജിമാരുടെയും വളണ്ടിയർമാരുടെയും  ആവശ്യങ്ങളടങ്ങിയ നിവേദനം കെ.എം.സി.സി നാഷണൽ കമ്മിറ്റി പ്രസിഡൻറ് കെ.പി മുഹമ്മദ്‌കുട്ടി കോൺസുൽ ജനറലിന് കൈമാറി. ജമാൽ വട്ടപ്പൊയിൽ, അഹമ്മദ് പാളയാട്ട്, അബൂബക്കർ അരിമ്പ്ര, സി.കെ ഷാക്കിർ എന്നിവർ കൂടിക്കാഴ്ചയിൽ  സംബന്ധിച്ചു.