വിമാനപകടം: സൽമാൻ രാജാവും കിരീടാവകാശിയും അനുശോചിച്ചു

റിയാദ്​: അഹമ്മദാബാദ് വിമാനാപകടത്തിൽ സൗദി ഭരണാധികാരി സൽമാൻ രാജാവും കിരീടാവകാശി അമീർ മുഹമ്മദ്​ ബിൻ സൽമാനും അനുശോചിച്ചു. ഗുജറാത്ത് തലസ്ഥാനമായ​ അഹമ്മദാബാദിലെ സർദാർ വല്ലഭായ്​ പ​ട്ടേൽ അന്താരാഷ്​ട്ര വിമാനത്താവളത്തിന്​ സമീപമുണ്ടായ അപകടം ഏറെ വേദനിപ്പിക്കുന്നതും ഞെട്ടിപ്പിക്കുന്നതുമാണെന്ന്​ ഇരുവരും അനുശോനക്കുറിപ്പിൽ പറഞ്ഞു.

നിരവധി ജീവനുകൾ പൊലിഞ്ഞ അപകടത്തിൽ അനുശോചിച്ചും ഇന്ത്യയുടെ ദുഃഖത്തിൽ പങ്കുചേർന്നും സൽമാൻ രാജാവും കിരീടാവകാശിയും ഇന്ത്യൻ പ്രസിഡൻറ്​ ദ്രൗപതി മുർമുവിന് അനുശോചന സന്ദേശങ്ങൾ അയച്ചു.

ഇന്ത്യയിലെ അഹമ്മദാബാദ് വിമാനത്താവളത്തിൽനിന്ന് പറന്നുയർന്ന ഉടൻ ഇന്ത്യൻ യാത്രാവിമാനം താമസകെട്ടിടത്തിന്​ മുകളിൽ തകർന്നുവീണ വാർത്ത ഞങ്ങൾ അറിഞ്ഞുവെന്നും ഇത്​ ധാരാളമാളുകളുടെ മരണത്തിനും പരിക്കുകൾക്കും കാരണമായെന്നും ഇരു സന്ദേശങ്ങളിലും പറഞ്ഞു. ഈ ദുരന്തത്തിൽ നിങ്ങളുടെ ദുഃഖത്തിൽ ചേരുന്നു. ഇന്ത്യൻ ​പ്രസിഡൻറിനും മരിച്ചവരുടെ കുടുംബങ്ങൾക്കും സൗഹൃദ ജനതക്കും ഞങ്ങളുടെ അഗാധമായ അനുശോചനവും ആത്മാർഥമായ ദുഃഖവും അറിയിക്കുന്നു. പരിക്കേറ്റവർ വേഗത്തിൽ സുഖം പ്രാപിക്കട്ടെ എന്ന്​ ആശിക്കുന്നുവെന്നും അനുശോചന സന്ദേശത്തിൽ പറഞ്ഞു.