കിദ്​വ വികസനം: കെട്ടിടം പൊളിച്ചുനീക്കാൻ നടപടി തുടങ്ങി

മക്ക: മക്ക മിസ്​ഫല ഡിസ്​ട്രിക്ടിലെ കിദ്​വ വികസന പദ്ധതിക്കുള്ളിൽ സ്ഥിതിചെയ്യുന്ന പ്രദേശത്തെ കെട്ടിടങ്ങൾ പൊളിക്കുന്നതിനും വസ്തുവകകൾ ഒഴിപ്പിക്കുന്നതിനുമുള്ള നടപടികൾ ആരംഭിക്കുന്നു. ആഗസ്​റ്റ്​ 13ന്​ കെട്ടിടങ്ങൾ പൊളിക്കലും നീക്കംചെയ്യലും ആരംഭിക്കുമെന്ന്​ മക്ക, മശാഇർ റോയൽ കമീഷൻ വ്യക്തമാക്കി. ഇതിന്റെ മുന്നോടിയായി അടുത്ത ദിവസങ്ങളിലായി പ്രദേശത്തെ കെട്ടിടങ്ങളിലേക്കുള്ള വെള്ളം, വൈദ്യുതി തുടങ്ങിയ സേവനങ്ങൾ വിച്ഛേദിക്കു​മെന്ന്​ അറിയിച്ചിട്ടുണ്ട്​. നഷ്​ടപരിഹാരത്തിനുള്ള കെട്ടിട ഉടമകൾ അപേക്ഷ നൽകുന്നതിനുള്ള സംവിധാനം സംബന്ധിച്ച വിവരങ്ങൾ ഉ​ടൻ പ്രഖ്യാപിക്കും. കിദ്​വ പ്രദേശത്തെ പൊളിക്കലും നീക്കംചെയ്യലും പുനരാരംഭിക്കുന്നതിനുള്ള തീയതി മക്ക, മശാഇർ റോയൽ കമീഷൻ നേരത്തേ പ്രഖ്യാപിച്ചിരുന്നു. ഏകദേശം 6,86,05,608 ചതുരശ്ര മീറ്റർ വിസ്തൃതിയിലാണ്​ പൊളിച്ചുനീക്കുന്നത്​. മക്കയിലെ ചേരികൾ വികസിപ്പിക്കാനുള്ള സമഗ്ര വികസനപദ്ധതിക്കുള്ളിലാണ്​ കിദ്​വയിലെ കെട്ടിടങ്ങൾ പൊളിച്ച് നീക്കംചെയ്യുന്നത്​.