സൽമാൻ രാജാവിന് കസാഖ്സ്താൻ പരമോന്നത ബഹുമതി

ജിദ്ദ: കസാഖ്സ്താനിലെ ഏറ്റവും ഉയർന്ന ബഹുമതിയായ 'ആൽട്ടിൻ ഖിറാൻ' സൽമാൻ രാജാവ് സ്വീകരിച്ചു. ഇരുരാജ്യങ്ങളും തമ്മിൽ നിലനിൽക്കുന്ന ആഴത്തിലുള്ള ബന്ധങ്ങൾ മാനിച്ചാണ് കസാഖ്സ്താൻ പ്രസിഡൻറ് കാസിം ജോമോർട്ട് തന്റെ രാജ്യത്തെ പരമോന്നത ബഹുമതി സൽമാൻ രാജാവിന് സമ്മാനിച്ചത്. പ്രസിഡൻറ് ജിദ്ദയിൽ താമസിക്കുന്നിടത്ത് വെച്ച് സൗദി വിദേശകാര്യ മന്ത്രി അമീർ ഫൈസൽ ബിൻ ഫർഹാൻ സൽമാൻ രാജാവിനുവേണ്ടി ബഹുമതി ഏറ്റുവാങ്ങി. രാജാവിനുവേണ്ടി കസാഖ്സ്താൻ പ്രസിഡൻറിന് വിദേശകാര്യ മന്ത്രി നന്ദിയും അഭിനന്ദനവും അറിയിച്ചു.