ഹരിതകാന്തിക്കിടയിലൂടെ​ ഹറമൈൻ ട്രെയിൻ

മക്ക: മഴയെ തുടർന്ന്​ പച്ചപ്പണിഞ്ഞ ഭൂപ്രദേശങ്ങളിലൂടെ ഹറമൈൻ ട്രെയിനുകൾ ഓടുന്നത്​ ഹൃദയാവർജകമായ കാഴ്​ചയായി മാറുന്നു. മക്ക, മദീന പുണ്യനഗരങ്ങളെ തമ്മിൽ ബന്ധിപ്പിക്കുന്ന ഹറമൈൻ എക്​സ്​പ്രസ്​ റെയിൽപാതക്ക്​ ഇരുവശവും മലനിരകളും താഴ്​വരകളും സമതലങ്ങളുമാണ്​ മഴപെയ്​ത്തോടെ പച്ചപ്പണിഞ്ഞിരിക്കുന്നത്​.

ഒരു പെയിൻറിങ്​ പോലെ നയനാനന്ദകരമായ മനോഹര കാഴ്​ചയാണ്​ ഇവിടം സമ്മാനിക്കുന്നത്​. 35 ട്രെയിനുകളാണ്​ ഈ പാതയിലോടുന്നത്​. ജിദ്ദ കിങ്​ അബ്​ദുൽ അസീസ്​ ഇൻറർനാഷനൽ എയർപോർട്ടിൽനിന്ന്​ തുടങ്ങി മക്ക പുണ്യനഗരം, റാബിഖിലെ കിങ്​ അബ്​ദുല്ല ഇകണോമിക്​ സിറ്റി എന്നിവയിലൂടെയാണ്​ മദീനയിലേക്ക്​ പാത നീളുന്നത്​.