തൊഴിൽ തട്ടിപ്പിൽ കുടുങ്ങിയ യുവാവ് നാടണഞ്ഞു

റിയാദ്: വിസ ഏജൻറി​​െൻറ ചതിയിൽ അകപ്പെട്ട്​ മരുഭൂമിയിൽ ദുരിതം നേരിട്ട മലയാളി യുവാവ് മാസങ്ങൾ നീണ്ട നിയമ പോരാട്ടങ്ങളിലൂടെ നാടണഞ്ഞു. റിയാദിൽ ഹൗസ് ഡ്രൈവർ വിസയിൽ എത്തിയ പാലക്കാട് ചെർപ്പുളശേരി സ്വദേശി അൻഷിഫാണ്​ (22) ഹതഭാഗ്യൻ. മലയാളി വിസ ഏജൻറ്​ റിയാദിൽ കൊണ്ടുവന്ന ശേഷം​ ജുബൈലിൽ നഗരത്തിൽ നിന്ന്​ 80 കിലോമീറ്റർ അകലെ മരുഭൂമിയിലെ കൃഷിത്തോട്ടത്തിൽ ജോലി കൊണ്ടാക്കുകയായിരുന്നു. വെള്ളമോ ഭക്ഷണമോ വെളിച്ചമോ ഇല്ലാതെ രണ്ടര മാസം ചുട്ടുപൊള്ളുന്ന മരുഭൂമിയിൽ ദുരിതം അനുഭവിച്ചു.

1,500 റിയാലാണ്​ ഏജൻറ്​ ശംബളം വാഗ്​ദാനം ചെയ്​തിരുന്നത്​. എന്നാൽ 1,000 റിയാലാണ്​ കിട്ടിയത്​. സഹായം തേടി യുവാവ്​ പ്ലീസ് ഇന്ത്യ എന്ന സംഘടനാപ്രവർത്തകരെ ഫോണിൽ ബന്ധപ്പെട്ടു. ദമ്മാം ഘടകം പ്രവർത്തകർ ജുബൈലിലെ മരുഭൂമിയിലെത്തി യുവാവിനെ രക്ഷപ്പെടുത്തുകയും ലേബർ കോടതിയിൽ കേസ്​ ഫയൽ ചെയ്യുകയും ചെയ്​തു. തുടർന്ന്​ സ്പോൺസറെ പല തവണ ബന്ധപ്പെട്ടെങ്കിലും പ്രശ്​ന പരിഹാരത്തിന്​ അദ്ദേഹം ഒരുക്കമായിരുന്നില്ല.

യുവാവിനെ ത​​െൻറ തോട്ടത്തിൽ നിന്ന്​ കടത്തിക്കൊണ്ടുപോയതിന്​ സാമൂഹിക പ്രവർത്തകർക്കെതിരെ കേസ് കൊടുക്കുമെന്ന്​ പറഞ്ഞ്​ ഭീഷണിപ്പെടുത്തുകയും ചെയ്​തു. പ്രവർത്തകരുടെ കഠിനപരിശ്രമത്തിനൊടുവിൽ യുവാവിന്​ എക്​സിറ്റ്​ ലഭിച്ചു. ഷാനവാസ്‌ രാമഞ്ചിറ, സക്കീർ ഹുസൈൻ, ലത്തീഫ് തെച്ചി, സതീഷ് പാലക്കാട്, മുജീബ് ഏകലൂർ, അനിൽകുമാർ ആലപ്പുഴ, ഷാഹിദ് വടപുറം, സൈഫുദ്ദീൻ എടപ്പാൾ, രതീഷ് തമ്പുരാൻ എന്നീ പ്ലീസ്​ ഇന്ത്യ പ്രവർത്തകരാണ്​ യുവാവിന്​ തുണയായത്​.