ജിദ്ദയിൽ കാറ്റ്​, ഇടി, മഴ; വിമാനസർവീസ്​ തടസപ്പെട്ടു

ജിദ്ദ: ഒരു ദിവസത്തെ ഇടവേളക്ക്​ ശേഷം ജിദ്ദയിൽ കാറ്റും ഇടിയും മഴയും. തിങ്കളാഴ്​ച രാവിലെ പത്ത്​ മണിയോടെയാണ്​ ശക്​തമായ കാറ്റിനും ഇടിമിന്നലിനുമൊപ്പം മഴ പെയ്​തത്. ഇതിനെ തുടർന്ന്​ ജിദ്ദ വിമാനത്താവളത്തിൽ സർവീസുകൾ 40 മിനിറ്റോളം നിർത്തിവെച്ചു.10.16 ന് നിർത്തിവെച്ച വിമാന സർവീസുകൾ 10.56 നാണ്​ ആരംഭിച്ചത്​. മഴകാരണം ചില വിമാനങ്ങളുടെ പുറപ്പെടൽ വൈകിയതായി ജിദ്ദ കിങ്​ അബ്​ദുൽ അസീസ്​ വിമാനത്താവള മീഡിയ വക്​താവ്​ തുർക്കി അൽദീബ്​ പറഞ്ഞു. ഒരാഴ്​ച നീണ്ട മഴക്ക്​ ഞായറാഴ്​ച ശമനമുണ്ടാ​യിരുന്നു. തിങ്കളാഴ്​ച പത്ത്​ മിനിറ്റോളം നീണ്ട ശക്​തമായ കാറ്റ്​ ഭീതി പരത്തി. ഉച്ചയായപ്പോഴേക്കും മാനം തെളിഞ്ഞു.

രാജ്യത്തെ പത്തോളം മേഖലകളിൽ തിങ്കളാഴ്​ച രാത്രി ഒമ്പത്​ വരെ കാറ്റും ഇടിയും മഴയുണ്ടാകുമെന്ന്​ കാലാവസ്​ഥ അധികൃതർ മുന്നറിയിപ്പ്​ നൽകി. ഇതേ തുടർന്ന്​ ബന്ധപ്പെട്ട വകുപ്പുകൾ വേണ്ട മുൻകരുതലെടുത്തു. തിങ്കളാഴ്​ച രാവിലെ ജിദ്ദയിലുണ്ടായ മഴക്കിടയിൽ അപകടങ്ങൾ റിപ്പോർട്ട്​ ചെയ്​തിട്ടില്ലെന്ന്​ മേഖല സിവിൽ ഡിഫൻസ്​ വക്​താവ്​ കേണൽ സഇൗദ്​ സർഹാൻ പറഞ്ഞു. ഏകീകൃത ഒാപ്പറേഷൻ സ​​െൻററിലൂടെ സിവിൽ ഡിഫൻസിന്​ ലഭിച്ച കാളുകൾ വൈദ്യുതി ​ഷോക്ക്​, വെള്ളം കെട്ടി നിൽക്കുക, മരം വീഴുക എന്നിവ അറിയിച്ചാണ്​.
സഹായം തേടി 29 കാളുകളെത്തി. ഇതിൽ 23 എണ്ണം ഷോക്കേറ്റ സംഭവവും ആറെണ്ണം വെള്ളം കെട്ടിനിന്നതും ഒന്ന്​ മരം വീണതുമാണ്​.