ആറ് അപൂർവ പുരാവസ്​തുക്കൾ  എസ്​.സി.ടി.എച്ചിന്​ കൈമാറി

ജിദ്ദ: ഇസ്​ലാമിന്​ മുമ്പുള്ള കാല​ത്തേത്​ ഉൾപ്പെടെയുള്ള ആറു അത്യപൂർവ പുരാവസ്​തുക്കൾ അധികൃതർക്ക്​ കൈമാറി. ഇവ കൈവശം ഉണ്ടായിരുന്ന അസീർ ബീശയിലുള്ള അലി സഅദ്​ അൽ ശഹ്​റാനി എന്നയാളാണ്​ സൗദി കമീഷൻ ഫോർ ടൂറിസം ആൻഡ്​ നാഷനൽ ഹെറിറ്റേജിന്​ (എസ്​.സി.ടി.എച്ച്​) വിട്ടുനൽകിയത്​. പുരാതന ലിപിയിൽ ഖുർആൻ ആലേഖനം ചെയ്​ത ഒര​ു ശിലയുൾപ്പെടെ ഇയാളിൽ നിന്ന്​ ലഭിച്ചുവെന്ന്​  എസ്​.സി.ടി.എച്ച് വക്​താവ്​ മാജിദ്​ അൽശദീദ്​ പറഞ്ഞു. അപൂർവങ്ങളായ ദേശീയ പൈതൃക വസ്​തുക്കൾ തിരിച്ചുപിടിക്കുന്നതിനുള്ള കാമ്പയി​​​െൻറ ഭാഗമാണിതെന്നും അലി സഅദ്​ അൽ ശഹ്​റാനിയുടെ മാതൃക എല്ലാവരും പിന്തുടരണമെന്നും അദ്ദേഹം കൂട്ടിച്ചേർത്തു.

ദേശീയ ദൗത്യത്തിൽ വൻ സംഭാവന നൽകിയ ശഹ്​റാനിയെ എസ്​.സി.ടി.എച്ച്​ അസീർ ശാഖ ഡയറക്​ടർ ജനറൽ മുഹമ്മദ്​ അൽഉംറാ അഭിനന്ദിച്ചു. ഇത്തരം വസ്​തുക്കൾ തിരി​ച്ചെടുക്കുന്നതിന്​ വലിയ പ്രാധാന്യമാണ്​ കമീഷൻ നൽകുന്നത്​. നവീന ശിലായുഗത്തിലെ അത്യപൂർവ സൗദി പുരാവസ്​തു തിരിച്ചുനൽകിയതിന്​ പോർച്ചുഗൽ അംബാസഡർ മാനുവൽ കാർവാലോയെ കഴിഞ്ഞ ഡിസംബറിൽ കമീഷൻ ആദരിച്ചിരുന്നു. ഇങ്ങനെ ലഭിച്ച വസ്​തുക്കളുടെ പ്രദർ​ശനം കഴിഞ്ഞവർഷം റിയാദിൽ സംഘടിപ്പിച്ചിരുന്നു.