ജിദ്ദ കടലോര ​ വികസന പദ്ധതി മക്ക ഗവർണർ ഉദ്​ഘാടനം ചെയ്​തു

ജിദ്ദ: ജിദ്ദ കടലോര ​ വികസന പദ്ധതിയുടെ നാല്​, അഞ്ച്​ ഘട്ടങ്ങൾ മക്ക ഗവർണർ അമീർ ഖാലിദ്​ അൽഫൈസൽ ഉദ്​ഘാടനം ചെയ്​തു. മേഖലക്ക്​ മുനിസിപ്പാലിറ്റി നൽകിവരുന്ന പ്രധാന്യമാണ്​ കടലോര പദ്ധതിയെന്ന്​ ഗവർണർ പറഞ്ഞു. മറ്റ്​ വലിയ പദ്ധതികളും ജിദ്ദയിൽ നടപ്പാക്കിവരുന്നുണ്ട്​.  
അൽഹറമൈൻ ട്രെയിൻ പരീക്ഷണ ഒാട്ടം ആരംഭിച്ചു. പദ്ധതി ഉടനെ ഉദ്​ഘാടനം ചെയ്യുമെന്നും അദ്ദേഹം പറഞ്ഞു. ജിദ്ദ ഗവർണർ അമീർ മിശ്​അൽ ബിൻ മാജിദ്​, മക്ക ഡെപ്യൂട്ടി ഗവർണറ അമീർ അബ്​ദുല്ല ബിൻ ബന്ദർ, ജിദ്ദ മേയർ ഡോ. ഹാനി അബൂറാസ്​ തുടങ്ങിയവർ സന്നിഹിതരായിരുന്നു.
കോർണിഷ്​ തീരത്ത്​ 7,30,000 ചതരുശ്ര മീറ്ററിൽ നാല്​ കിലോമീറ്റർ നീളത്തിലാണ്​ നാല്​, അഞ്ച്​ ഘട്ടം​ കോർണിഷ്​ വികസന പദ്ധതി നടപ്പാക്കിയിരിക്കുന്നത്​. 800 ദശലക്ഷം റിയാലാണ്​​ ഇതി​​െൻറ ചെലവ്​​. 
കടലിന്​ അഭിമുഖമായ ഭാഗങ്ങളെ താമസക്കാർക്കും സന്ദർശകർക്കും ഉല്ലാസത്തിനെത്തുന്നവർക്കും സൗകര്യമായ വിധത്തിലും ആകർഷകമായ നിലയിലും ആവശ്യമായ സേവനങ്ങളും നൂതനമായ സൗകര്യങ്ങളും ഒരുക്കി ആകർഷകമായ രീതിയിലാണ്​​ വികസിപ്പിച്ചിരിക്കുന്നത്​.​ ​ 
നൗറസ്​ റൗണ്ട്​ എബൗട്ട്​ മുതൽ ജുബൈർ ബിൻ ഹാരിസ്​  റോഡുവരെ നീണ്ട നിൽക്കുന്ന പദ്ധതി ജിദ്ദ മുനിസിപ്പാലിറ്റിയാണ്​ നടപ്പാക്കിയിരിക്കുന്നത്​. മൊത്തം ആറ്​ ഘട്ടങ്ങളിലായാണ്​  കോർണിഷ്​ വികസനം നടപ്പാക്കുന്നത്​. 
നേരത്തെ മൂന്ന്​ ഘട്ടങ്ങൾ പൂർത്തിയായി​.  ജുബൈർ ബിൻ ഹാരിസ്​ റോഡ്​ മുതൽ വടക്ക്​ മസ്​ജിദുറഹ്​മ വരെ നീണ്ടു നിൽക്കുന്നതാണ്​ ആറാംഘട്ടം.