ജിദ്ദ വിമാനത്താവളം വഴി ഇന്ത്യൻ ഹാജിമാർ എത്തിത്തുടങ്ങി

ജിദ്ദ: ജിദ്ദ വിമാനത്താവളം വഴിയുള്ള ഇന്ത്യന്‍ ഹാജിമാരുടെ തീര്‍ഥാടനം ചൊവ്വാഴ്​ച  ആരംഭിച്ചു. കര്‍ണാടകയില്‍ നിന്നുള്ള തിര്‍ഥാടകരാണ് ആദ്യ വിമാനത്തിലുണ്ടായിരുന്നത്. 340 ഹാജിമാരെയുമായി ബംഗളുരുവില്‍ നിന്നുള്ള എയര്‍ഇന്ത്യ വിമാനം ചാവ്വാഴ്​ച രാവിലെ 6.40നാണ്​ ജിദ്ദ വിമാനത്താവളത്തിലെത്തിയത്​.  ഹജ്ജ് ടെര്‍മിനലിൽ ഇന്ത്യന്‍ അംബാസഡര്‍ അഹമ്മദ് ജാവേദ്, പത്​നി ശബ്നം ജാവേദ്, കോണ്‍സല്‍ ജനറല്‍ മുഹമ്മദ് നൂര്‍ റഹ്​മാൻ ശൈഖ് എന്നിവരുടെ നേതൃത്വത്തില്‍ തീര്‍ഥാടകരെ സ്വീകരിച്ചു. ഹജ്ജ്​ കോണ്‍സല്‍ ജനറല്‍ മുഹമ്മദ് ഷാഹിദ് ആലം , എയര്‍ഇന്ത്യ റീജ്യണല്‍ മാനേജര്‍ നൂര്‍ മുഹമ്മദ് എന്നിവരും തീര്‍ഥാടകരെ സ്വീകരിക്കാനെത്തിയിരുന്നു. എമിഗ്രേഷന്‍ നടപടികള്‍ പൂര്‍ത്തിയാക്കി ഏഴരയോടെ തീര്‍ഥാടകര്‍ ടെര്‍മിനലിന് പുറത്തിറങ്ങി. ഹാജിമാരെ സഹായിക്കാന്‍ ഇന്ത്യന്‍ പില്‍ഗ്രിംസ് ഫോറം , കെ.എം.സി.സി എന്നീ കൂട്ടായ്മകളുടെ വളണ്ടിയര്‍മാരും രംഗത്തുണ്ടായിരുന്നു. പത്ത് മണിയോടെ ഹാജിമാര്‍ ബസ്​ മാര്‍ഗം മക്കയിലേക്ക് പുറപ്പെട്ടു. 

മക്കയില്‍ മസ്ജിദുല്‍ ഹറാമിന് പരിസരത്ത് ഗ്രീന്‍ കാറ്റഗറിയിലും ഏഴ് കിലോമീറ്റര്‍ അകലെ അസീസിയയിലുമാണ് തീര്‍ഥാടകര്‍ക്ക് താമസമൊരുക്കിയിട്ടുള്ളത്. അസീസിയയില്‍ നിന്ന്​ 24 മണിക്കൂറും ഹറമിലേക്ക് ബസ് സർവീസ് ഏര്‍പ്പെടുത്തിയിട്ടുണ്ട്. ജൂലൈ 24 മുതല്‍ മദീന വഴി ആരംഭിച്ച ഹജ്ജ് തീര്‍ഥാടനം ചൊവ്വാഴ്​ച  പുലര്‍ച്ചെയോട‌െ അവസാനിച്ചു. 62000 ഹാജിമാരാണ് മദീനയിലെത്തിയത്. കേരളത്തില്‍ നിന്നുള്ള ഹാജിമാര്‍ ഞായറാഴ്ച മക്കയിലെത്തും. അതേ സമയം സ്വകാര്യ ഗ്രൂപ്പ്​ വഴി വന്ന ഹാജിമാർ മദീന സന്ദർശനം പൂർത്തിയാക്കിക്കൊണ്ടിരിക്കയാണ്​. സർക്കാർ ഗ്രൂപ്​ വഴി വരുന്നവർക്ക്​ മക്ക^ മദീന യാത്രക്കും താമസകേന്ദ്രത്തിൽ നിന്ന്​ ഹറമിലേക്ക്​ വരാനും ഇത്തവണ മികച്ച ബസുകളാണ്​ ഏർപെടുത്തിയത്​. 

മദീനയിലെ താമസ സൗകര്യവും കുറമറ്റതാണ്​. കഴിഞ്ഞ തവണ ഇൗ രണട്​ വിഷയങ്ങളിലുമാണ്​ പരാതി ഉണ്ടായിരുന്നത്​. ഹറമിന്​ സമീപം ഗ്രീൻ കാറ്റഗറിയിൽ താമസിക്കുന്നവർക്ക്​ ഇത്തവണയും ഭക്ഷണം സ്വന്തം നിലയിൽ പാചകം ചെയ്യാൻ അനുമതിയില്ല. അതേ സമയം അസീസിയയിൽ താമസിക്കുന്നവർക്ക്​ ഭക്ഷണം പാചകം ചെയ്​ത്​ കഴിക്കാൻ സൗകര്യമുണ്ട്​. മലയാളി സന്നദ്ധ സംഘടനകളടക്കം ഹാജിമാ​െര സഹായിക്കാൻ വളണ്ടിയർമാരെ സജീവമായി രംഗത്തിറക്കിയിട്ടുണ്ട്​.