അന്താരാഷ്​ട്ര ഖുർആൻ പാരായണ മനഃപാഠ മത്സരം തുടങ്ങി

മദീന: 40ാമത്​ കിങ്​ അബ്​ദുൽ അസീസ്​ അന്താരാഷ്​ട്ര ഖുർആൻ പാരായണ, മനഃപാഠ മത്സരം തുടങ്ങി. മതകാര്യ വകുപ്പ്​ മന്ത്രി ഡോ.അബ്​ദുൽ ലത്തീഫ്​ ആലു ​​ശൈഖിനു വേണ്ടി മത്സര വിഭാഗം അസി.​ സെക്രട്ടറി ജനറൽ പരിപാടി ഉദ്​ഘാടനം ചെയ്​തു. മസ്​ജിദുന്നബവി കാര്യാലയ അണ്ടർ സെക്രട്ടറി സ്വാലിഹ്​ അൽമുസീനി, ദേശീയ അന്തർദേശിയ ഖുർആൻ മത്സര വകുപ്പ്​ ജനറൽ സെക്രട്ടറി ഡോ. മൻസൂർ അൽ സുമൈഹ്​, സൗദിയിലെ നൈജീരിയൻ അംബാസഡർ മുഹമ്മദ്​ ഇൗസ ദാവൂദ്​ തുടങ്ങിയവർ സംബന്ധിച്ചു.

നേരത്തെ നടന്ന സ്​ക്രീനിങ്ങിൽ മികച്ച പ്രകടനം കാഴ്​ച വെച്ചവരെയാണ്​​ അവസാനഘട്ട മത്സരങ്ങളിലേക്ക്​​ തെരഞ്ഞെടുത്തത്​. അഞ്ച്​ വിഭാഗങ്ങളിലായാണ്​ മത്സരം. 82 രാജ്യങ്ങളിൽ നിന്നായി 115 പേരുണ്ട്​​. രാവിലേയും വൈകുന്നേരവുമായി മസ്​ജിദുന്നബവയിൽ നടക്കുന്ന മത്സര പരിപാടികൾ ബുധനാഴ്​ച വരെ തുടരും. 30 വർഷത്തിനു ശേഷം ആദ്യമായാണ്​ മസ്​ജിദുന്നബവി കിങ്​ അബ്​ദുൽ അസീസ്​ അന്താരാഷ്​ട്ര ഖുർആൻ മത്സരത്തിന്​ വേദിയാകുന്നത്​.
നേരത്തെ മക്ക ഹറമിലായിരുന്നു മത്സരവേദി.