റിയാദിൽ സുഗന്ധങ്ങളുടെ വസന്തം; രാജ്യാന്തര പെർഫ്യൂം പ്രദർശനം ഇന്ന്​ രാത്രി 11വരെ

റിയാദ്: സുഗന്ധദ്രവ്യങ്ങളുടെയും ഊദി​ന്റെയും ലോകത്തെ ഏറ്റവും വലിയ വിപണികളിലൊന്നായ റിയാദിൽ, ‘ബ്ലൂ ഊദ്’ രാജ്യാന്തര പ്രദർശനം ശ്രദ്ധേയമാകുന്നു. റിയാദ് സീസണിന്റെ ഭാഗമായി റിയാദ്​ ഇന്റർനാഷണൽ എക്​സിബിഷൻ സെന്ററിൽ കഴിഞ്ഞ 10 ദിവസമായി നടന്നുവരുന്ന മേളയിൽ ലോകത്തിന്റെ വിവിധ ഭാഗങ്ങളിൽനിന്നുള്ള പ്രമുഖ ബ്രാൻഡുകളാണ് അണിനിരക്കുന്നത്. മേള ഇന്ന്​ (ശനിയാഴ്​ച) രാത്രി 11ന്​ സമാപിക്കും.

ലോകത്തിലെ തന്നെ ഏറ്റവും വിലപിടിപ്പുള്ളതും ഗുണമേന്മയുള്ളതുമായ ‘ബ്ലൂ ഊദ്’ അഥവാ അഗർവുഡ് ശേഖരമാണ് ഈ മേളയുടെ പ്രധാന ആകർഷണം. ഊദ് പ്രേമികൾക്കായി അപൂർവ്വമായ എണ്ണകളും ഊദ്​ മരക്കഷ്ണങ്ങളും ഇവിടെ പ്രദർശിപ്പിച്ചിട്ടുണ്ട്. ആഗോള ബ്രാൻഡുകളുടെ സാന്നിധ്യമാണ്​ മേളയുടെ മറ്റൊരു പ്രത്യേകത. സൗദി അറേബ്യയിലെ പ്രമുഖ പെർഫ്യൂം ബ്രാൻഡുകൾക്ക് പുറമെ, യൂറോപ്പിൽ നിന്നുള്ള പ്രശസ്ത ഫ്രഞ്ച് സുഗന്ധദ്രവ്യ നിർമാതാക്കളും മേളയിൽ പങ്കെടുക്കുന്നുണ്ട്.

ലൈവ് മേക്കിങ്​ സെഷനുകളും മേളയുടെ സവിശേഷതയാണ്​. പെർഫ്യൂമുകൾ നിർമിക്കുന്ന രീതിയും ഊദ് വാറ്റിയെടുക്കുന്ന പ്രക്രിയയും നേരിട്ട് കാണാനുള്ള സൗകര്യവും സന്ദർശകർക്കായി ഒരുക്കിയിട്ടുണ്ട്. സ്വന്തമായി സുഗന്ധങ്ങൾ മിക്സ് ചെയ്യാനുള്ള അവസരവും ചില സ്​റ്റാളുകൾ നൽകുന്നു. വൈകുന്നേരം നാല്​ മുതൽ രാത്രി 11വരെയാണ് മേളയിലേക്ക്​ പൊതുജനങ്ങൾക്ക് പ്രവേശനം. ഡിസംബർ അവസാന വാരം ആരംഭിച്ച മേളയിൽ സൗദിക്കകത്തുനിന്നും പുറത്തുനിന്നുമായി ആയിരക്കണക്കിന് സന്ദർശകരാണ് ഓരോ ദിവസവും എത്തുന്നത്.