കോ​വി​ഡ്​ ച​ട്ട​ങ്ങ​ൾ ലം​ഘി​ച്ച സ്ഥാ​പ​ന​ങ്ങ​ൾ അ​ട​ച്ചു​പൂ​ട്ടി

ജി​ദ്ദ: കോവിഡ്​ മുൻകരുതൽ ലംഘിച്ചതിനെ തുടർന്ന് രാജ്യത്ത്​ വിവിധയിടങ്ങളിലായി നിരവധി സ്ഥാപനങ്ങൾ അടച്ചുപൂട്ടി.​ ജിദ്ദയിൽ 298 സ്ഥാപനങ്ങൾക്കാണ്​ മുനിസിപ്പാലിറ്റി താഴിട്ടത്​. കഴിഞ്ഞ രണ്ടു​ ദിവസത്തിനിടയിലാണ്​ ഇത്രയും സ്ഥാപനങ്ങൾ അടച്ചുപൂട്ടിയതെന്ന്​ മുനിസിപ്പാലിറ്റി ബ്രാഞ്ചുകളുടെ അണ്ടർ സെക്രട്ടറി എൻജി. മുഹമ്മദ്​ അൽമുതൈരി പറഞ്ഞു. ഇൗ മേഖലയിൽ മൊത്തം 8,824 പരിശോധനകൾ നടത്തി. ​341 നിയമലംഘനങ്ങൾ രേഖപ്പെടുത്തി.

പരിശോധന മുമ്പുള്ളതിനേക്കാൾ കർശനമാക്കുകയും കൂടുതൽ സംഘങ്ങളെ നിയോഗിക്കുകയും ചെയ്​തിട്ടുണ്ട്​. കച്ചവട കേന്ദ്രങ്ങൾ, റസ്​റ്റാറൻറുകൾ, കഫേകൾ തുടങ്ങിയവ പരിശോധിച്ചതിലുൾപ്പെടും. സിനിമ ഹാളുകൾ, വാണിജ്യ കോംപ്ലക്​സിനും റസ്​റ്റാറൻറുകൾക്കും അകത്തും പുറത്തുമുള്ള വിനോദ കേന്ദ്രങ്ങൾ, ജിം സെൻററുകൾ, കായിക കേന്ദ്രങ്ങൾ, മണ്ഡപങ്ങൾ അടച്ചതായും അണ്ടർ സെക്രട്ടറി പറഞ്ഞു.

വിവിധ ബ്രാഞ്ച്​ ഒാഫിസുകൾക്ക്​ കീഴിൽ പരിശോധന തുടരുമെന്നും എല്ലാവരും ആരോഗ്യ മുൻകരുതൽ പാലിക്കണമെന്നും മുനിസിപ്പൽ അധികൃതർ ആവ​ശ്യപ്പെട്ടു. രാജ്യത്തെ മറ്റു മേഖലകളിലും ആരോഗ്യ മുൻകരുതൽ പരിശോധന തുടരുകയാണ്​. റിയാദിൽ 24 മണിക്കൂറിനുള്ളിൽ 114 സ്ഥാപനങ്ങൾ അടച്ചുപൂട്ടിയതായി റിയാദ്​ മുനിസിപ്പാലിറ്റി അറിയിച്ചു​. വെള്ളിയാഴ്​ച 57 സ്ഥാപനങ്ങൾക്ക്​ താഴിട്ടിരുന്നു. 4,900 പരിശോധനകൾ നടത്തി. 617 നിയമലംഘനങ്ങൾ കണ്ടെത്തി. ഭാഗികമായും പൂർണമായും കോവിഡ്​ മുൻകരുതൽ പാലിക്കാത്ത സ്ഥാപനങ്ങൾ ഇതിലുണ്ടെന്ന്​ മുനിസിപ്പാലിറ്റി വ്യക്തമാക്കി.