Begin typing your search above and press return to search.
exit_to_app
exit_to_app
Homechevron_rightGulfchevron_rightSaudi Arabiachevron_rightസൗദിയിൽ ആറ് തൊഴിലുകളിൽ ...

സൗദിയിൽ ആറ് തൊഴിലുകളിൽ കൂടി സ്വദേശിവത്​കരണം

text_fields
bookmark_border
Ahmad ibn Sulaiman al-Raji
cancel
Listen to this Article

ജിദ്ദ: സൗദി അറേബ്യയിൽ കൂടുതൽ തൊഴിൽമേഖലകളിൽ സ്വദേശിവത്​കരണം നടപ്പാക്കുന്നു. ആറ്​ തൊഴിലുകളിലാണ് പുതുതായി സ്വദേശികൾക്കായി സംവരണം ചെയ്യുന്നതായി മാനവ വിഭവശേഷി സാമൂഹിക വികസന മന്ത്രി എൻജി. അഹ്​മദ്​ ബിൻ സുലൈമാൻ അൽറാജിഹി പ്രഖ്യാപിച്ചു​. വ്യോമയാന രംഗത്തെ ജോലികൾ, കണ്ണട രംഗവുമായി ബന്ധപ്പെട്ട ജോലികൾ, വാഹന പീരിയോഡിക് പരിശോധന (ഫഹസ്) ജോലികൾ, തപാൽ ഔട്ട്​ലെറ്റുകളിലെ ജോലികൾ, പാഴ്സൽ ട്രാൻസ്പോർട്ട്​ ജോലികൾ, കസ്റ്റമർ സഴ്വിസ് ജോലികൾ, ഏഴ്​ വിൽപന ഔട്ട്​ലറ്റുകളിലെ ജോലികൾ എന്നിവയാണ്​ സ്വദേശിവത്​കരിക്കുന്നത്. ഇതിലൂടെ 33,000 ലധികം തൊഴിലവസരങ്ങളാണ്​ ലക്ഷ്യമിടുന്നത്​.

വ്യോമയാന രംഗത്തെ ജോലികൾ സ്വദേശിവൽക്കരിക്കാനുള്ള തീരുമാനം രണ്ട് ഘട്ടങ്ങളിലായി നടപ്പാക്കും. ആദ്യ ഘട്ടം 2023 മാർച്ച്​ 15ന് ആരംഭിക്കും. അസിസ്റ്റൻറ്​ പൈലറ്റ്, എയർ ട്രാഫിക് കൺട്രോളർ, എയർ ട്രാൻസ്പോർട്ടർ എന്നിവ 100 ശതമാനവും വിമാന പൈലറ്റുമാർ 60 ശതമാനവും എയർഹോസ്​റ്റസ്​ 50 ശതമാനവും സ്വദേശിവത്കരിക്കും. രണ്ടാംഘട്ടം 2024 മാർച്ച്​ നാലിന്​ ആരംഭിക്കും. ഇതിൽ വിമാന പൈലറ്റ്​ 70 ശതമാനവും എയർ​ഹോസ്​റ്റസ്​ 60 ശതമാനവുമായി ഉയർത്തും. വ്യോമയാന തൊഴിലുകളിൽ അഞ്ചോ അതിലധികമോ ജീവനക്കാരെ നിയമിക്കുന്ന എല്ലാ സ്വകാര്യ സ്ഥാപനങ്ങൾക്കും തീരുമാനം ബാധകമാണ്. 4,000 പൗരന്മാർക്ക് ഇതിലൂടെ തൊഴിലവസരങ്ങൾ ലഭിക്കും.

നാലോ അതിൽ കൂടുതലോ ജോലിക്കാരുള്ള സ്വകാര്യ കണ്ണട സ്ഥാപനങ്ങളിലും 2023 മെയ്​ 18 മുതൽ സ്വദേശിവത്​കരണം 50 ശതമാനം നടപ്പാക്കും. മെഡിക്കൽ ഒപ്റ്റിക്സ് ടെക്നീഷ്യൻ, ഫിസിക്കൽ ലബോറട്ടറി ടെക്നീഷ്യൻ, ലൈറ്റ് ആൻഡ്​ ഒപ്റ്റിക്സ്, ഒപ്റ്റിക്കൽ ടെക്നീഷ്യൻ എന്നീ ജോലികൾ ഇതിലുൾപ്പെടും. 1,000ത്തിലധികം തൊഴിലവസരങ്ങൾ ഇതിലൂടെ ലക്ഷ്യമിടുന്നു​.

വാഹനങ്ങളുടെ പീരിയോഡിക്കൽ സാങ്കേതിക പരിശോധന സേവന കേന്ദ്രത്തിലെ ജോലികൾ രണ്ട് ഘട്ടങ്ങളായാണ്​ സ്വദേശിവത്​കരിക്കുക. ആദ്യഘട്ടത്തിൽ 50 ശതമാനവും രണ്ടാംഘട്ടത്തിൽ 100 ശതമാനവും. സൈറ്റ് മാനേജർ, അസിസ്​റ്റൻറ്​ മാനേജർ, ക്വാളിറ്റി മാനേജർ, ഫിനാൻഷ്യൽ സൂപർവൈസർ, സൈറ്റ് സൂപർവൈസർ, ട്രാക്ക് ഹെഡ്, ഇൻസ്​പെക്ഷൻ ടെക്നീഷ്യൻ, ഇൻസ്പെക്ഷൻ അസിസ്​റ്റൻറ്​ ടെക്നീഷ്യൻ, മെയിൻറനൻസ് ടെക്നീഷ്യൻ, ഇൻഫർമേഷൻ ടെക്നീഷ്യൻ, ഡാറ്റാ എൻട്രി എന്നീ തസ്തികകളാണ് സ്വദേശിവത്കരിക്കുന്നത്. 5,000-ത്തിലധികം തൊഴിലവസരങ്ങൾ ഇതിലൂടെ ലഭ്യമാകും. ഒരു വർഷത്തിനുള്ളിൽ നിയമം നടപ്പാക്കും.

തപാൽ, പാഴ്സൽ ഗതാഗത കേന്ദ്രങ്ങളിലെ 14 ജോലികൾ സ്വദേശിവത്കരിക്കും. ഈ വർഷം ഡിസംബർ 17ന്​ ഈ രംഗത്തെ സ്വദേശിവത്കരണം ആരംഭിക്കും. ചീഫ് എക്സിക്യൂട്ടീവുകളുടെ ജോലികൾ 100 ശതമാനവസീനിയർ മാനേജ്‌മെന്റ് ലെവൽ ജോലികൾ 60 ശതമാനവും സീനിയർ മാനേജ്‌മെൻറ്​ രണ്ടാം ലെവൽ ജോലികൾ 70 ശതമാനവും സ്വദേശിവത്​കരിക്കും. ഈ മേഖലയിൽ 7,000-ത്തിലധികം തൊഴിലവസരങ്ങൾ സ്വദേശികൾക്കായി മാറ്റിവെക്കും.

ഉപഭോക്തൃ സേവന (കസ്റ്റമർ സർവിസ്​) സ്ഥാപനങ്ങളിലെ തൊഴിൽ സ്വദേശിവത്കരണം 100 ശതമാനമാണ്. ഈ വർഷം ഡിസംബർ 17 മുതൽ നടപ്പാക്കും. 4,000 തൊഴിലവസരങ്ങൾ ലക്ഷ്യമിടുന്നു. ഏഴ്​ വിൽപ്പന കേന്ദ്രങ്ങളിലെ സ്വദേശിവത്​കരണത്തിൽ മൊത്തം തൊഴിലാളികളുടെ 70 ശതമാനം ഉൾപ്പെടുന്നതാണ്​. സുരക്ഷാ ഉപകരണങ്ങൾ വിൽക്കുന്നതിനുള്ള ഔട്ട്​ലറ്റുകൾ, എലിവേറ്ററുകൾ, ഗോവണികൾ, ബെൽറ്റുകൾ എന്നിവ വിൽക്കുന്നതിനുള്ള ഔട്ട്​ലറ്റുകൾ, കൃത്രിമ പുല്ലും നീന്തൽക്കുളങ്ങളും വിൽക്കുന്നതിനുള്ള ഔട്ട്​ലറ്റുകൾ, ജല ശുദ്ധീകരണ ഉപകരണങ്ങളും നാവിഗേഷൻ ഉപകരണങ്ങളും വിൽക്കുന്നതിനുള്ള ഷോപ്പുകൾ, കാറ്ററിങ്​ ഉപകരണങ്ങളും ഇലക്ട്രിക് വാഹനങ്ങളും വിൽക്കുന്ന കേന്ദ്രങ്ങൾ എന്നിവയും സ്വദേശിവത്കരണ തീരുമാനത്തിൽ ഉൾപ്പെടും.

ആയുധങ്ങൾ, വേട്ടയാടൽ, യാത്രാസാമഗ്രികൾ എന്നിവയുടെ വിൽപ്പനയ്ക്കുള്ള ഔട്ട്​ലറ്റുകൾ, പാക്കേജിങ്​ ഉപകരണങ്ങളും ടൂൾ ഔട്ട്ലെറ്റുകളും ഉൾപ്പെടും. ബ്രാഞ്ച് മാനേജർ, സൂപർവൈസർ, ട്രഷറർ, കസ്റ്റമർ അക്കൗണ്ടൻറ്​, കസ്​റ്റമർ സർവിസ് എന്നിവയാണ് സ്വദേശിവത്കരിക്കുന്നത്. ഇങ്ങനെ 12,000 ത്തിലധികം തൊഴിലവസരങ്ങൾ സൃഷ്ടിക്കപ്പെടും. ഒരു വർഷത്തിനുള്ളിൽ നടപ്പാകും.

Show Full Article
TAGS:Indigenization Saudi Arabia 
News Summary - Indigenization in Saudi Arabia with six more job
Next Story