അൽബാഹയിൽ 11​ ​തൊഴിൽ മേഖലകളിൽ സ്വദേശിവത്​കരണം

ജിദ്ദ: ദക്ഷിണ സൗദിയിലെ അൽബാഹ പ്രവിശ്യയിൽ 11​ ​തൊഴിൽ മേഖലകൾ സ്വദേശിവത്​കരിക്കാൻ തീരുമാനം. ഇതു സംബന്ധിച്ച്​ മാനവ വിഭവശേഷി മന്ത്രി എൻജി. അഹമ്മദ്​ ബിൻ സുലൈമാൻ അൽരാജിഹി ഉത്തരവിട്ടു​. അതത്​ പ്രദേശങ്ങളിലെ സ്വദേശിവത്​കരണ പദ്ധതിയുടെ ഭാഗമാണിത്​. അൽബാഹ ഗവർണറേറ്റി​െൻറ സഹകരണത്തോടെയാണ്​​ മന്ത്രാലയം ഇതു നടപ്പാക്കുന്നത്​.

അൽബാഹ പ്രവിശ്യയിൽ സ്വദേശികൾക്ക്​ കൂടുതൽ തൊഴിലവസരങ്ങൾ ഒരുക്കുകയും തൊഴിൽ വിപണിയിലെ സ്വദേശിവത്​കരണം കാര്യക്ഷമാക്കുകയും ലക്ഷ്യമിട്ടാണ് നടപടി​​. റെഡിമെയ്​ഡ്​ വസ്ത്രങ്ങൾ, വീട്ടുപകരണങ്ങൾ, പാത്രങ്ങൾ, എല്ലാ തരത്തിലുമുള്ള പരവതാനികൾ, പുസ്​തകങ്ങൾ, ഓഫിസ് ഉപകരണങ്ങൾ, കളിപ്പാട്ടങ്ങൾ, സൈക്കിളുകൾ, ഇലക്ട്രിക്കൽ ഉപകരണങ്ങൾ, പ്ലാസ്​റ്റിക് വസ്​തുക്കൾ, സോപ്പുകൾ, ഡിറ്റർജൻറുകൾ, വെള്ളം, ശീതള പാനീയങ്ങൾ, പഴം പച്ചക്കറികൾ, ഇൗത്തപ്പഴം തുടങ്ങിയ 11 മേഖലകളിലാണ്​ സമ്പൂർണ സ്വദേശിവത്​കരണം.

ഗിഫ്​റ്റുകളും കരകൗശലവസ്​തുക്കളും വിൽക്കുന്ന സ്ഥാപനങ്ങളിലെ ശുചീകരണ ജോലിയും ലോഡിങ്​ ആൻഡ്​​ അൺലോഡിങ് ജോലിയും ഡ്രൈവർ ജോലിയും ഒഴികെ ബാക്കി​യെല്ലാ ജോലികളുമാണ്​ 100 ശതമാനവും സ്വദേശികൾക്ക്​ മാത്രമായി നിജപ്പെടുത്തുന്നത്​. കഫേകളിൽ സ്വദേശിവത്​കരണം 50 ശതമാനവും റസ്​റ്റാറൻറുകളിൽ 40 ശതമാനവുമായിരിക്കും. പുതിയ തീരുമാനം 2022 ജനുവരി 14 മുതൽ ​പ്രാബല്യത്തിൽ വരും. സ്വ​കാര്യ സ്ഥാപനങ്ങൾക്ക്​ തീരുമാനം സംബന്ധിച്ച വിവരങ്ങൾ വിശദമായി അറിയുന്നതിനും സ്വദേശികളെ ജോലിക്ക്​ നിയമിക്കുന്നതിന്​ ആവശ്യമായ നടപടിക്രമങ്ങൾ അറിയുന്നതിനുമുള്ള മാർഗനിർദേശങ്ങൾ മന്ത്രാലയം പുറത്തിറക്കി​.