ഇന്ത്യൻ ഹജ്ജ്​ മിഷൻ ഒാപറേഷൻ വൻവിജയം -കോൺസൽ ജനറൽ

ജിദ്ദ: ഇൗ വർഷത്തെ ഇന്ത്യൻ ഹജ്ജ്​ മിഷൻ ഒാപറേഷൻ വൻ വിജയമായിരുന്നു എന്ന്​  കോൺസൽ ജനറൽ മുഹമ്മദ്​ നൂർ റഹ്​മാൻ ശൈഖ്​ പറഞ്ഞു. സൗദി ഗവൺമ​െൻറി​​െൻറ സഹായ സഹകരണങ്ങളോട്​ കൂടി എല്ലാ മേഖലയിലും മികവുറ്റ സേവനം ഹാജിമാർക്ക്​ ലഭ്യമാക്കാൻ സാധിച്ചു എന്ന്​ ​കോൺസുലേറ്റിൽ നടത്തിയ വാർത്താ സമ്മേളനത്തിൽ അദ്ദേഹം പറഞ്ഞു. 

മക്കയിലെ താമസം, ഗതാഗതം, മിനായിലെ ഭക്ഷണം തുടങ്ങിയ വിഷയങ്ങളിൽ പരമാവധി പരാതിക്കിടയില്ലാത്ത സേവനം നൽകി. വളണ്ടിയർമാരുടെ സേവനം എടുത്തു പറയേണ്ടതാണ്​. മക്ക- മദീന ബസ്​ സർവീസ്​ മികച്ചതായിരുന്നു. അതേ സമയം മദീനയിലെ താമസവുമായി ബന്ധപ്പെട്ട ചില പരാതികളുണ്ടായതായി  അദ്ദേഹം പറഞ്ഞു. 

മുഴുവൻ ഹാജിമാർക്കും മർക്കസിയ മേഖലയിൽ താമസം ലഭ്യമാക്കാനായിരുന്നു ഇത്തവണത്തെ കരാർ. പക്ഷെ ഹാജിമാരുടെ എണ്ണക്കൂടുതൽ കാരണം മുഴുവൻ പേർക്കും ഹറമിനടുത്ത്​ താമസം ലഭ്യമാക്കാൻ ഹജ്ജ്​ സേവനകമ്പനികൾക്ക്​ സാധിച്ചില്ല. ഇൗ സാഹചര്യത്തിൽ മർക്കസിയയിൽ താമസം ലഭിക്കാത്ത ഹാജിമാർക്ക്​ 350 റിയാൽ വീതം തിരിച്ചു നൽകാൻ നടപടി സ്വീകരിച്ചതായും അദ്ദേഹം പറഞ്ഞു. ഹോട്ടലുകളിലെ അസൗകര്യങ്ങളെ കുറിച്ച പരാതികളിൽ യഥാസമയം ഹജ്ജ്​ മിഷൻ ഇടപെട്ട്​ പരിഹാരം കാണാൻ ശ്രമിച്ചിട്ടുണ്ട്​.

അടുത്ത വർഷം മുതൽ മുഴുവൻ ഹാജിമാർക്കും മശാഇർ മെട്രോ ട്രെയിൻ സർവീസ്​ ലഭ്യമാക്കാൻ നടപടി സ്വീകരിക്കും. അറഫ^ മിന യാത്രക്കിടയിലെ പ്രയാസങ്ങൾ ഒഴിവാക്കാൻ ഇതുവഴി സാധിക്കും. ഇത്തവണ  ചില മഖ്​തബിനു കീഴിലെ ഹാജിമാർക്ക്​  അറഫയിൽ യഥാസമയം എത്താൻ കഴിയാത്തത്​ പ്രയാസമുണ്ടാക്കി. ബന്ധപ്പെട്ട മക്തബ് ഗതാഗത സൗകര്യം ഒരുക്കിയതിലെ വീഴ്ചയാണ് കാരണം. 

ഇവര്‍ക്കെതിരെ നടപടി എടുക്കാന്‍ അധികൃതരോട് ആവശ്യപ്പെട്ടിട്ടുണ്ട്. ഇന്ത്യൻ ഹജ്ജ്​ മിഷ​​െൻറ ചരിത്രത്തിൽ ആദ്യമായാണ്​ അങ്ങനെയൊരു സംഭവം. ഇതാവർത്തിക്കാതിരിക്കാൻ ട്രെയിൻ സർവീസ്​ ആശ്രയിക്കുകയാണ്​ പരിഹാരം. 209 ഇന്ത്യന്‍ ഹാജിമാരാണ് ഇത്തവണ മരണപ്പെട്ടത്. ഇവരില്‍ 164 പേര്‍ ഹജ്ജ് കമ്മിറ്റി വഴിയും 45 പേര്‍ സ്വകാര്യ ഗ്രൂപുകള്‍ വഴിയും എത്തിയവരാണ്. 

ഇന്ത്യന്‍ ഹാജിമാരില്‍ ആറ്​ പേര്‍ മക്കയിലും 16 പേര്‍ മദീനയിലും ആസ്പത്രിയില്‍ ചികില്‍സയില്‍ കഴിയുന്നുണ്ട്. ഇന്ത്യന്‍ ഹാജിമാരുടെ മടക്ക യാത്ര ഒക്ടോബര്‍ അഞ്ചിന്​ പൂര്‍ത്തിയാവും. കേന്ദ്ര സര്‍ക്കാറി​​െൻറ പുതിയ ഹജ്ജ് നയം രൂപവത്​കരിക്കുന്നതിനായി ഒക്ടോബര്‍ ഏഴിന് മുംബൈയില്‍ യോഗം ചേരുന്നുണ്ട്. ആവശ്യമായ നിര്‍ദേശങ്ങള്‍ യോഗത്തില്‍ സമര്‍പിക്കും. 

പൊതുമാപ്പ്​ ഉപയോഗപ്പെടുത്താൻ വിപുലമായ സംവിധാനങ്ങൾ കോൺസുലേറ്റി​​െൻറ നേതൃത്വത്തിൽ നടക്കുന്നതായി സി.ജി  പറഞ്ഞു. എമർജൻസി പാസ്​പോർട്ടുകൾ നൽകാൻ നജ്​റാൻ, ജീസാൻ തുടങ്ങിയ ഉൾപട്ടണങ്ങളിൽ കോൺസുലേറ്റ്​ സംഘം ക്യാമ്പുകൾ സംഘടിപ്പിച്ചു. ഇ.സി ലഭിച്ചവർക്ക്​ ശുമൈസിയിലേക്ക്​ ബസ്​ സൗകര്യമൊരുക്കിയിട്ടുണ്ട്​.