ഇന്ത്യൻ ഹജ്ജ്​ മിഷ​െൻറ  ‘ഫ്രൈഡേ ഒാപറേഷൻ’ വിജയകരം

മക്ക: ദുൽഹജ്ജ്​ ആദ്യ വെള്ളിയാഴ്ച ഒന്നെകാൽ  ലക്ഷത്തോളം  ഹാജിമാരെ പ്രശനങ്ങളൊന്നും കൂടാതെ   ജുമുഅയിലും പ്രാർഥനയിലും  പങ്കെടുപ്പിച്ച ചാരിതാർഥ്യത്തിൽ ഇന്ത്യൻ ഹജ്ജ് മിഷൻ.  ഹാജിമാരെല്ലാം  അതിരാവിലെ തന്നെ ഹറമിലേക്കു പുറപ്പെട്ടിരുന്നു. ഹജ്ജിനു മുമ്പുള്ള അവസാന വെള്ളിയാഴ്ചത്തെ തിരക്ക്​ പരിഗണിച്ച്​ ഹജ്ജ് മിഷൻ പ്രത്യേക നിർദേശങ്ങൾ  നൽകി.  ചെറു ഭക്ഷണം കൈയിൽ കരുതണം,  അസുഖമുള്ള  ഹാജിമാർ റൂമിൽ തന്നെ പ്രാർഥന നിർവഹിക്കണം , ഏറ്റവും കൂടുതൽ  പേർ താമസിക്കുന്ന  അസീസിയ മുഹത്തതുൽ ബാങ്കിലെ ഹാജിമാർ ഒമ്പതു മണിക്ക്​ മുമ്പ്​ തന്നെ  ഹറമിൽ എത്തണം, ബിൻഹുമൈദിൽ താമസിക്കുന്നവർ  ഒമ്പത്​ മുതൽ പുറപ്പെടണം എന്നീ നിർദേശങ്ങളാണ്​ നൽകിയിരുന്നത്​. വിവിധ ബസ്​ സ്​റ്റേഷനുകളിൽ സേവനത്തിന്​  ഓരോ സന്നദ്ധ സംഘടനകളെയും ചുമതല ഏൽപിച്ചു. ഹജ്ജ് മിഷനിലെ മുഴുവൻ ഉദ്യോഗസ്​ഥരെയും അണിനിരത്തിയാണ്​ ഹജ്ജ്​ മിഷൻ ‘ഫ്രൈഡെ ഒാപറേഷൻ’ വിജയകരമായി പൂർത്തിയാക്കിയത്​.  

600 ബസുകൾ  4000 സർവീസുകൾ ഇന്ത്യൻ ഹാജിമാർക്കായി നടത്തിയതായി  അസീസിയ ട്രാൻസ്പോർ​േട്ടഷൻ  കോ^ഒാർഡിനേറ്റർ  ബി.അബ്​ദുൽ നാസർ  പറഞ്ഞു.  മെഡിക്കൽ വിഭാഗത്തിൽ അഡീഷനൽ ഉദ്യോഗസ്​ഥരെ നിയോഗിച്ച്​ ഖുദായിലും, ബാബലി, മഹാബസത്തുൽ ജിനിലും ആബുലൻസ് അടക്കമുള്ള  എല്ലാ സംവിധാനങ്ങളും സജ്ജമാക്കിയിരുന്നു. ഹജ്ജ് മിഷ​​െൻറയും വിവിധ സംഘടനകളുടെയും സഹകരണത്തോടെ വെള്ളം, ചെരിപ്പ്​  എന്നവ വിതരണം ചെയ്തു. 
ജുമുഅയിലും പ്രാർഥനയിലും പങ്കെടുത്ത ഹാജിമാരെ നാല്​ ​ മണിയോടെ  താമസ സ്ഥലത്ത്​ എത്തിക്കാനായി.  കോൺസൽ ജനറൽ മുഹമ്മദ്​ നൂർ റഹ്‌മാൻ ശൈഖും , ഹജ്ജ്​ കോൺസൽ മുഹമ്മദ്​ ഷാഹിദ് ആലമും ആദ്യാവസാനം  വരെ വളണ്ടിയർമാർക്കൊപ്പം സജീവമായി രംഗത്തുണ്ടായിരുന്നു.