സൗദിയിൽ കോവിഡ്​ ബാധിതരായി ശേഷിക്കുന്നത്​ 3093 പേർ മാത്രം

റിയാദ്​: സൗദി അറേബ്യയിൽ കോവിഡ് ബാധിതരായി ബാക്കിയുള്ളത്​ 3093 പേർ മാത്രം. പുതുതായി രോഗം ബാധിക്കുന്നവരുടെ എണ്ണവും കുറഞ്ഞു.

രാജ്യം കോവിഡ്​ മുക്തമായ സ്ഥിതിയിലേക്ക്​ വളരെ വേഗം അടുക്കുന്നു എന്നാണ്​ ഇത്​ സൂചിപ്പിക്കുന്നത്​. രോഗബാധിതരിൽ 473 പേർ മാത്രമാണ്​ ഗുരുതരാവസ്ഥയിലുള്ളത്​. ഇവർ രാജ്യത്തെ വിവിധ ആശുപത്രികളിലെ തീവ്രപരിചരണ വിഭാഗത്തിലാണ്​. ബാക്കിയുള്ളവരുടെ ആരോഗ്യ സ്ഥിതി തൃപ്​തികരമാണ്​.

ചൊവ്വാഴ്​ച പുതുതായി 142 പേർക്ക്​ മാത്രമാണ്​ രോഗം സ്ഥിരീകരിച്ചത്​. 201 പേർ​ 24 മണിക്കൂറിനിടെ സുഖം പ്രാപിച്ചു​. രാജ്യത്ത്​ വിവിധയിടങ്ങളിലായി 10 മരണങ്ങളും റിപ്പോർട്ട്​ ചെയ്​തു. രാജ്യത്തെ ഇതുവരെ റിപ്പോർട്ട്​ ചെയ്​ത കോവിഡ്​ കേസുകളുടെ എണ്ണം 360155 ഉം രോഗമുക്തരുടെ എണ്ണം 350993 ഉം ആയി.

മരണസംഖ്യ 6069 ആയി ഉയർന്നു. രാജ്യത്തെ കോവിഡ്​ മുക്തി നിരക്ക്​ 97.5 ശതമാനവും മരണനിരക്ക്​ 1.7 ശതമാനവുമാണ്​. കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കോവിഡ്​ കേസുകൾ: റിയാദ്​ 34, മക്ക 32, മദീന 19, അസീർ 14, കിഴക്കൻ പ്രവിശ്യ 15, അസീർ 11, തബൂക്ക്​​ 7, അൽജൗഫ്​ 5, ഖസീം 5, അൽബാഹ 4, നജ്​റാൻ 3, ഹാഇൽ 3, ജീസാൻ 3, വടക്കൻ അതിർത്തി മേഖല​ 1.