ഹൂതികളുടെ രക്തദാഹം:റിയാദിൽ കൊല്ലപ്പെട്ടത്​​ വിദേശ തൊഴിലാളി

റിയാദ്​: ഞായറാഴ്​ച രാത്രി സൗദി തലസ്ഥാന നഗരത്തെ ലക്ഷ്യമാക്കി വന്ന ഹൂതികളുടെ മിസൈൽ അപഹരിച്ചത്​ സാധാരണക്കാരനായ ഒരു വിദേശ തൊഴിലാളിയുടെ ജീവൻ. വടക്കൻ ഇൗജിപ്​തിൽ നിന്നുള്ള അബ്​ദുൽ മുത്തലിബ്​ ഹുസൈൻ അലി എന്ന 39 കാരനാണ്​ യമൻ വിമതരുടെ രക്തദാഹത്തിന്​ ഇരയായത്​. ഇറാൻ പിന്തുണയിൽ ഹൂതികൾ നടത്തുന്ന ആക്രമണത്തിലെ റിയാദിലെ ആദ്യ രക്തസാക്ഷിയാണ്​ ഇയാൾ. ഞായറാഴ്​ച രാത്രി 11ഒാടെ റിയാദ്​, ജീസാൻ, നജ്​റാൻ നഗരങ്ങളെ ലക്ഷ്യമാക്കി തൊടുത്ത ഏഴ്​ ബാലിസ്​റ്റിക്​ മിസൈലുകളെയും സൗദി വ്യോമ പ്രതിരോധ സംവിധാനം വിജയകരമായി തകർത്തുകളഞ്ഞിരുന്നു.

തകർന്നുവീണ മിസൈൽ ഭാഗങ്ങൾ പതിച്ചുണ്ടായ അപകടത്തിലാണ്​​ അബ്​ദുൽ മുത്തലിബി​​​​​െൻറ മരണം. ഒപ്പമുണ്ടായിരുന്ന സഹോദരൻ മുഹമ്മദിനും മറ്റൊരു ഇൗജിപ്​തുകാരനും​ പരിക്കേൽക്കുകയും ചെയ്​തു. റിയാദ്​ നഗരത്തി​ലെ വടക്കുകിഴക്ക്​ ഭാഗത്ത്​ ഒരു കെട്ടിടത്തി​​​​​െൻറ മുകളറ്റത്തെ നിലയിലാണ്​​ ഇവർ താമസിച്ചിരുന്നത്​. ആക്രമണമുണ്ടായപ്പോൾ മൂന്നുപേരും മുറിക്കുള്ളിലിരുന്നു ഭക്ഷണം കഴിക്കുകയായിരുന്നു. മിസൈലി​​​​​െൻറ തകർന്ന ഭാഗങ്ങൾ വീണ്​ കെട്ടിടത്തി​​​​​െൻറ ഒരു ഭാഗം തകരുകയും കനത്ത പുകയും പൊടിപടലങ്ങളും മുറിയിൽ നിറയുകയും ചെയ്​തു.

മിസൈൽ ഭാഗം പതിച്ച്​ കെട്ടിടത്തി​​​​​െൻറ സീലിങ്ങിൽ വലിയ തുളയുണ്ടായി. ഇതിലൂടെ കൂടുതൽ ഭാഗങ്ങൾ അകത്തേക്ക്​ പതിക്കുകയായിരുന്നു. ഇൗ ഭാഗത്താണ്​ അബ്​ദുൽ മുത്തലിബ്​ ഇരുന്നത്​. തത്സമയം മരണം സംഭവിച്ചു. മറ്റ്​ രണ്ടുപേർക്കും സാരമായി പരിക്കേറ്റു. ​ദ്രുതകർമ സേന ഉടൻ രക്ഷാപ്രവർത്തനം നടത്തുകയും പരിക്കേറ്റവരെ ആശുപത്രിയിൽ പ്രവേശിപ്പിക്കുകയും ചെയ്​തു. അബ്​ദുൽ മുത്തലിബി​​​​​െൻറ മൃതദേഹം ആശുപത്രി മോർച്ചറിയിലേക്കും മാറ്റി. മൃതദേഹം സ്വദേശത്തേക്ക്​ കൊണ്ടുപോകാനുള്ള നടപടികൾ ആരംഭിച്ചതായി ഇൗജിപ്​ഷ്യൻ എംബസി അറിയിച്ചു. മരിച്ചയാളുടെയും പരിക്കേറ്റവരുടെയും കുടുംബങ്ങളെ ഇൗജിപ്​ഷ്യൻ വിദേശകാര്യ മന്ത്രാലയം അനുശോചനം അറിയിക്കുകയും ആശ്വസിപ്പിക്കുകയും ചെയ്​തു.

ഒരു കരാർ കമ്പനിയിലെ തൊഴിലാളികളാണ്​ ഇവർ. മരിച്ച അബ്​ദുൽ മുത്തലിബ്​ ഒന്നര വർഷം മുമ്പാണ്​ റിയാദിലെത്തിയത്​. ഒരു മകനും മകളുമുണ്ട്​. ‘ഇൗജിപ്​ഷ്യൻ രക്തസാക്ഷി അബ്​ദുൽ മുത്തലിബ്​’ എന്ന പേരിൽ ഹൂതി അക്രമത്തിനെതിരെ സാമൂഹിക മാധ്യമങ്ങളിൽ ശക്തമായ ഹാഷ്​ ടാഗ്​ പ്രചാരണം ആരംഭിച്ചിട്ടുണ്ട്​. സാധാരണക്കാരായ ജനങ്ങളുടെ ജീവനുപോലും പുല്ലുവില കൽപിച്ച്​ ഇറാൻ പിന്തുണയോടെ അക്രമണം നടത്തുന്ന ഹൂതികൾ അയച്ച മിസൈലുകളിൽ മൂ​ന്നെണ്ണമാണ്​ റിയാദിന്​ നേരെ വന്നത്​. ഇതുവരെയുണ്ടായ ആക്രമണത്തിൽ ഏറ്റവും വലുതാണ്​ ഇത്തവണത്തേതെന്നും എന്നാൽ സൗദിയുടെ ശക്തവും ഫലപ്രദവുമായ പ്രതിരോധമാണ്​ അക്രമണ ലക്ഷ്യത്തെ തകർക്കാനും പ്രഹരശേഷി കുറയ്​ക്കാനും സഹായിച്ചതെന്നും വിലയിരുത്തപ്പെടുന്നു.