ഹൗസ്​ ഡ്രൈവർ തൊഴിൽ മേഖലയിൽ പകുതിയോളം ഇടിവിന്​ സാധ്യത

റിയാദ്​: വനിതകൾക്ക്​ വാഹനമോടിക്കാനുള്ള നിരോധം നീങ്ങിയതോടെ സൗദിയിലെ ഹൗസ്​ ഡ്രൈവർ തൊഴിൽ മേഖലയിൽ വലിയ മാറ്റത്തിന്​ സാധ്യത. പത്ത്​ ലക്ഷത്തോളം വിദേശികൾ ജോലി ചെയ്യുന്ന മേഖലയിൽ വലിയ ഇടിവ്​ പ്രതീക്ഷിക്കുന്നുണ്ട്​. തുടക്കത്തിൽ ഹൗസ്​ ഡ്രൈവർമാരുടെ പണി ഒറ്റയടിക്ക്​ ഇല്ലാതാവില്ലെങ്കിലും ക്രമേണ കുടുംബങ്ങളുടെ ചെലവ്​ ചുരുക്കലി​​​​െൻറ ഭാഗമായി  ഡ്രൈവർമാരെ വെട്ടിക്കുറക്കുമെന്നാണ്​ സൂചന. മാത്രമല്ല വിദേശ വനിതകൾക്കും ഡ്രൈവിംഗ്​ ലൈസൻസ്​ അനുവദിക്കുന്ന സാഹചര്യത്തിൽ ഗാർഹികജോലിക്കാരായ വനിതകൾക്ക്​ ഡ്രൈവിങ്​ജോലി കൂടി ആവാമെന്ന അവസ്​ഥ വരും. മുൻകാലങ്ങളെ അപേക്ഷിച്ച്​ കുടുംബ ബജറ്റ് കുറക്കുക എന്ന പ്രവണത രാജ്യത്ത്​ ദൃശ്യമാണ്​. ഹൗസ്​ ഡ്രൈവർമാർക്കും വീട്ടുജോലിക്കാർക്കുമായി രാജ്യത്ത്​ 33 ദശലക്ഷം റിയാൽ ചെലവഴിക്കുന്നുണ്ടെന്നാണ്​ കണക്ക്​. 

ജീവിതച്ചെലവ്​ വെട്ടിക്കുറക്കാനായാൽ ഇത്​ ആളോഹരി വരുമാനത്തെ ഗുണപരമായി ബാധിക്കുമെന്നാണ്​ സാമ്പത്തിക വിദഗ്​ധരുടെ വിലയിരുത്തൽ. സർക്കാറിനും ബീമമായ മെച്ചം ലഭിക്കും. സർക്കാർ ഗാർഹിക തൊഴിലാളികൾക്ക്​ സൗജന്യ ചികിൽസ ഉൾപെടെ പല ആനുകൂല്യങ്ങളും നൽകുന്നുണ്ട്​. രാജ്യത്ത്​ നടപ്പിലാക്കിയ ലെവി നിയമം ഗാർഹികതൊഴിലാളികൾക്ക്​ ബാധകമല്ല. വനിതകളെ ജോലി സ്ഥലത്ത് എത്തിക്കാനും കുട്ടികളെ സ്കൂളിലെത്തിക്കാനുമാണ് ഭൂരിഭാഗം പേരും ഹൗസ്​ ഡ്രൈവർമാരെ വെക്കുന്നത്​. വനിതകളുടെ ബുദ്ധിമുട്ട് മാത്രം പരിഗണിച്ചാണ് ഭൂരിഭാഗം പുരുഷൻമാരും ഡ്രൈവര്‍മാരെ നിയോഗിച്ചത്.  ഇൗ ജോലികളെല്ലാം വീട്ടിലെ സ്​ത്രീകൾക്കോ, ജോലിക്കാരിക്കോ ചെയ്യാവുന്ന അവസ്​ഥ വരും. പുതിയ തലമുറയിലെ പെൺകുട്ടികൾ വിദ്യാഭ്യാസവും കാര്യപ്രാപ്​തിയും കൂടുതലുള്ളവരാണെന്നാണ്​ വിലയിരുത്തപ്പെടുന്നത്​. ഇൗ സാഹചര്യത്തിൽ ഒരു  ഡ്രൈവറെ ആശ്രയിക്കാതെ തന്നെ മുന്നോട്ട്​ പോവുന്ന പ്രവണത വരും. ഇതെല്ലാം ​വലിയൊരു തൊഴിൽമേഖലക്ക്​ ഫലത്തിൽ തിരിച്ചടിയാവുമെന്നാണ്​ പ്രതീക്ഷിക്കുന്നത്​്​. 
മലയാളികൾ ഉൾ​പെടെ വലിയൊരു പ്രവാസി സമൂഹത്തെയാണിത്​ ബാധിക്കുക. കേരളത്തിൽ നിന്ന്​ ലക്ഷക്കണക്കിന്​ ആളുകൾ ഹൗസ്​ഡ്രൈവർ വിസയിൽ ​സൗദിയിൽ ജോലി ചെയ്യുന്നുണ്ട്​. പ്രത്യേകിച്ച്​ വലിയ വിദ്യാഭ്യാസ യോഗ്യതയില്ലാത്ത ആളുകൾ സൗദിയിൽ ഇൗ മേഖലയിൽ ജോലി നോക്കുന്നുണ്ട്​്​. ജീവിതച്ചെലവ്​ കുറവായതിനാൽ അവർക്ക്​ കിട്ടുന്ന വരുമാനം കൊണ്ട്​  നാട്ടിൽ കുടുംബങ്ങൾക്ക്​ സാമാന്യം നല്ല ജീവിത നിലവാരം ഉറപ്പുവരുത്തിയിരുന്നു. പുതിയ സാഹചര്യത്തിൽ കേരളത്തിലെ സാമൂഹിക ജീവിതത്തെ ഇവിടുത്തെ പരിഷ്​കാരം വലിയ തോതിൽ ബാധിക്കും എന്നാണ്​ വിലയിരുത്തപ്പെടുന്നത്​. 50 ശതമാനത്തോളം ഹൗസ് ഡ്രൈവര്‍മാരുടെ സേവനത്തില്‍ നിന്ന് സ്വദേശി കുടുംബങ്ങള്‍ പിന്മാറുമെന്ന് സൗദിയിലെ സാമ്പത്തിക മാധ്യമങ്ങള്‍ പറയുന്നു.