റമദാനിനോടനുബന്ധിച്ച് ഹോട്ടലുകളിൽ നിരീക്ഷണം ശക്തമാക്കും

ത്വാഇഫ്: റമദാനിനോടനുബന്ധിച്ച് ഹോട്ടലുകളിലും ഭക്ഷ്യവിൽപന കേന്ദ്രങ്ങളിലും നിരീക്ഷണം ശക്തമാക്കാൻ ത്വാഇഫ് മുനിസിപ്പാലിറ്റി തീരുമാനിച്ചു. 
വിവിധ മുനിസിപ്പൽ ബ്രാഞ്ച് ഓഫീസുകൾക്ക് കീഴിലെ റമദാൻ പദ്ധതികളെക്കുറിച്ച ചർച്ചയിലാണ് ഭക്ഷ്യവിൽപന കേന്ദ്രങ്ങളിൽ നിരീക്ഷണം ശക്തമാക്കാൻ തീരുമാനിച്ചത്.  റമദാനും വേനലവധിയും പെരുന്നാളും ടൂറിസം ആഘോഷങ്ങളും കണക്കിലെടുത്ത് ഹോട്ടലുകളിലും ബസ്​തകളിലും ശക്തമായ നിരീക്ഷണം നടത്താനുള്ള പദ്ധതികൾ ആവിഷ്കരിച്ചതായി മുനിസിപ്പാലിറ്റി സേവന വിഭാഗം അണ്ടർ സെക്രട്ടി ഡോ. അബ്​ദുല്ല ബിൻ സഈദ് അൽഗാമിദി പറഞ്ഞു. ഇതിനാവശ്യമായ ഒരുക്കങ്ങൾ നടത്താൻ അദ്ദേഹം ആവശ്യപ്പെട്ടു. 

അനധികൃത ബസ്​തകൾ തടയുക, ഗോഡൗണുകൾ, ഭക്ഷ്യനിർമാണ കേന്ദ്രങ്ങൾ, ഹോട്ടലുകൾ, മത്ബഖുകൾ, ബഖാലകൾ എന്നിവിടങ്ങളിലെ പരിശോധനക്കും മുഴുസമയ പരാതികൾ സ്വീകരിക്കുന്നതിനും വേണ്ട കാര്യങ്ങൾ യോഗത്തിൽ ചർച്ച ചെയ്തതായും അദ്ദേഹം പറഞ്ഞു.