കുളമ്പടിയൊച്ചകൾ തീർത്ത് അൽഅഹ്‌സയിൽ കുതിരയോട്ട മത്സരം

ദമ്മാം: കിഴക്കൻ പ്രവിശ്യയിലെ അൽഅഹ്സയിൽ കുളമ്പടിയൊച്ചകൾ തീർത്ത് 21ാമത് കുതിരയോട്ട മത്സരം അരങ്ങേറി. കുതിരകളുടെ ഇനം, നിറം, തൂക്കം, ഉയരം, വയസ്സ് എന്നിങ്ങനെ വിവിധ മാനദണ്ഡങ്ങൾ അനുസരിച്ച് 12 ഇനങ്ങളിൽ മത്സരം നടന്നു. അശ്വവേഗത്തി​െൻറ പുതിയ ചരിത്രം കുറിച്ച്, മികച്ച പ്രകടനം കാഴ്ചവെച്ച് വിജയികളായ കുതിരകളുടെ ഉടമകൾക്കുള്ള സമ്മാനദാനവും വേദിയിൽ അരങ്ങേറി.

അൽഅഹ്സയിലെ പ്രത്യേകം സജ്ജമാക്കിയ മൈതാനത്താണ് മത്സരങ്ങൾ നടന്നത്. പ്രവിശ്യ വിനോദസഞ്ചാര വകുപ്പി​െൻറയും നഗരസഭയുടെയും നേതൃത്വത്തിൽ റിയാദിലെ ഹോഴ്‌സ് റൈഡിങ​്​ ക്ലബി​െൻറ സഹകരണത്തോടെയാണ് മത്സരം സംഘടിപ്പിച്ചത്. കേവല വിനോദത്തിനപ്പുറം സൈനിക സുരക്ഷയുടെയും ആഢ്യത്വത്തി​െൻറയും പ്രതീകമായി കുതിരകളെ വളർത്തി പരിപാലിച്ചിരുന്ന മുൻഗാമികളുടെ സംഭവബഹുലമായ ജീവിത രീതികളെക്കുറിച്ച് പുതുതലമുറക്ക് പരിചയപ്പെടുത്തലും ചടങ്ങി​െൻറ ലക്ഷ്യമാണ്.

അറേബ്യന്‍ കുതിരകളുടെ ശക്തിയും കുതിപ്പും സൗന്ദര്യവും വിളിച്ചോതുന്ന മത്സരങ്ങൾ കാണാൻ നിരവധി സന്ദർശകരാണ് ഒഴുകിയെത്തിയത്. എല്ലാ വർഷവും വിപുലമായി നടന്നുവരാറുള്ള അശ്വമേളയിൽ സൗദി, യു.എ.ഇ, ബഹ്‌റൈൻ, കുവൈത്ത് തുടങ്ങിയ ജി.സി.സി രാഷ്‌ട്രങ്ങളിൽനിന്ന്​ കുതിരകളെത്താറുണ്ട്. കോവിഡ് വ്യാപനത്തി​െൻറ പശ്ചാത്തലത്തിൽ കോവിഡ് മാനദണ്ഡങ്ങൾ കൃത്യമായി പാലിച്ച് സംഘടിപ്പിച്ച ചടങ്ങ് ശനിയാഴ്ച മാത്രമാണ് നടന്നത്.