സൗദിയിൽ മഴയും മഞ്ഞുവീഴ്ചയും തുടരുമെന്ന് കാലാവസ്ഥ കേന്ദ്രം

യാംബു: സൗദിയുടെ വിവിധ പ്രദേശങ്ങളിൽ മഴയും മഞ്ഞുവീഴ്ചയും ഈയാഴ്ചയും തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. തബൂക്ക്, അൽജൗഫ്, വടക്കൻ അതിർത്തി മേഖല, ഹാഇൽ എന്നിവയുൾപ്പെടെ രാജ്യത്തെ 10 പ്രദേശങ്ങളിൽ ഈയാഴ്ച പ്രകടമാകുന്ന കാലാവസ്ഥാ വ്യതിയാനത്തെ കുറിച്ച് കേന്ദ്രം മുന്നറിയിപ്പ് നൽകി.

കഴിഞ്ഞയാഴ്​ച ശക്തമായ മഴയും മഞ്ഞുവീഴ്ചയും ആലിപ്പഴ വർഷവും ഇടിമിന്നലും കാറ്റുമുണ്ടായിരുന്നു. അതേ കാലാവസ്ഥ ഈയാഴ്ചയും തുടരാൻ സാധ്യതയുണ്ടെന്ന്​ കേന്ദ്രം പ്രവചിച്ചു. മക്ക, മദീന, അൽബഹ, അൽഖസീം, റിയാദ്, കിഴക്കൻ പ്രവിശ്യ എന്നിവയുൾപ്പടെയുള്ള പ്രദേശങ്ങളിലും മറ്റു ചിലയിടങ്ങളിലും ആണ് കാലാവസ്ഥാ മാറ്റം കൂടുതൽ അനുഭവപ്പെടുകയെന്ന് റിപ്പോർട്ടിൽ വ്യക്തമാക്കി.

ഇടിമിന്നൽ, മഞ്ഞുവീഴ്ച, താഴ്ന്ന താപനില, കാറ്റ്​ എന്നിവ അനുഭവപ്പെടാനിടയുണ്ട്​. ജിദ്ദയിൽ കഴിഞ്ഞ ദിവസങ്ങളിലുണ്ടായ മഴ ഈയാഴ്ച്ചയിലെ വ്യാഴം, വെള്ളി ദിവസങ്ങളിൽ ശക്തി പ്രാപിക്കാൻ സാധ്യതയുള്ളതായും കാലാവസ്ഥ കേന്ദ്രം വക്താവ് അറിയിച്ചു. നവംബർ 24-ന് ജിദ്ദയിൽ ശക്തമായ മഴയുണ്ടായിരുന്നു. തുടർന്ന്​ വെളളപ്പൊക്കവും വെള്ളപ്പാച്ചിലുമുണ്ടായി.

എന്നാൽ ഈയാഴ്ച മഴ അത്രത്തോളം ശക്തിപ്രാപിക്കാനിടയില്ലെന്നും വക്താവ് ചൂണ്ടിക്കാട്ടി. മഴയോടനുബന്ധിച്ചുണ്ടാകുന്ന കാറ്റും ചെങ്കടലിലെ ശക്തമായ തിരമാലകളും ജാഗ്രതയോടെ കാണണമെന്നും മഴയുണ്ടാകുമ്പോൾ താഴ്ന്ന പ്രദേശങ്ങളിലും തോടുകൾക്കരികിലും താഴ്വാരങ്ങൾക്ക് താഴെയും താമസിക്കുന്നവർ കൂടുതൽ ജാഗ്രത പാലിക്കണമെന്നും സിവിൽ ഡിഫൻസ് മുന്നറിയിപ്പ് നൽകി.