മക്കയിലും ജിദ്ദയിലും മഴ

ജിദ്ദ: മക്കയിലും ജിദ്ദയിലും മഴ. വെള്ളിയാഴ്​ച വൈകീട്ടാണ്​ മക്കയുടെ വിവിധ ഭാഗങ്ങളിലും ജിദ്ദയിലും മഴയുണ്ടായത്​. മേഖലയിൽ മഴയുണ്ടാകുമെന്ന്​ സിവിൽ ഡിഫൻസ്​ നേരത്തെ മുന്നറിയിപ്പ്​ നൽകിയിരുന്നു. ശക്തമായ കാറ്റി​െൻറയും ഇടിയുടെയും അകമ്പടിയോടെയാണ്​ മക്കയിൽ മഴയുണ്ടായത്​. മസ്​ജിദുൽ ഹറാം, ഹറം പരിസരം, മിന, അറഫ, മുസ്​ദലിഫ പുണ്യസ്ഥലങ്ങൾ, കൂടാതെ മറ്റ്​ ഡിസ്​റ്റിക്​റ്റുകളിലും മർകസുകളിലും സാമാന്യം ശക്തമായ മഴ​ പെയ്​തു​. തെരുവുകളിൽ പ്രത്യേകിച്ച് അസീസിയ പ്രദേശത്ത് വെള്ളം നിറഞ്ഞു. ഇത്​ വാഹനങ്ങളുടെ പോക്കുവരവുകളെ തടസ്സപ്പെടുത്തി. ചെറിയ ചില വാഹനങ്ങൾ വെള്ളക്കെട്ടിൽ കുടുങ്ങി. മഴ മുന്നറിയിപ്പിനെ തുടർന്ന്​ സിവിൽ ഡിഫൻസ് ടീമുകൾ മക്കയിലുടനീളം തങ്ങളുടെ സാന്നിധ്യം ശക്തമാക്കിയിരുന്നു.

ജിദ്ദയുടെ വിവിധ ഭാഗങ്ങളിലും സമാന്യം നല്ല മഴയാണ്​ ഉണ്ടായത്​. താഴ്​ന്ന സ്ഥലങ്ങളിലെല്ലാം നേരിയ വെള്ളക്കെട്ടുകളുണ്ടായി. മുൻകരുതലെന്നോണം ജിദ്ദ ഗവർണറേറ്റിലെ 72 സ്ഥലങ്ങളിൽ സിവിൽ ഡിഫൻസ് തങ്ങളുടെ സംവിധാനങ്ങൾ വിന്യസിച്ചിരുന്നു. അതേ സമയം, അടുത്ത തിങ്കളാഴ്ച വരെ ജിദ്ദയിൽ മഴക്കുള്ള സാധ്യത തുടരുമെന്ന് കാലാവസ്ഥ വിഭാഗം ഔദ്യോഗിക വക്താവ് ഹുസൈൻ അൽഖഹ്താനി പറഞ്ഞു.