ഹറമൈൻ ട്രെയിനിൽ യാത്ര ചെയ്യാൻ സൽമാൻ രാജാവിന്​ മോഹം

ജിദ്ദ: അൽഹറമൈൻ ​െ​ട്രയിൻ പരീക്ഷണ ഒാട്ടത്തിൽ മദീന ​ഗവർണർ അമീർ ഫൈസൽ ബിൻ സൽമാനും. ഇന്നലെയാണ്​ മദീനയിൽ നിന്ന്​ മക്ക വരെ ട്രെയിനിൽ അദ്ദേഹം യാത്രക്കാരനായത്​. അടുത്ത മദീന സന്ദർശന വേളയിൽ അൽഹറമൈൻ ട്രെയിനിൽ മക്കയിലേക്ക്​ യാത്ര ചെയ്യാൻ സൽമാൻ രാജാവ്​ ആഗ്രഹം പ്രകടിപ്പിച്ച കാര്യവും മകനായ അമീർ ഫൈസൽ സൂചിപ്പിച്ചു. രാജ്യത്തെ പൊതുഗതാഗത മേഖലക്ക്​ സൽമാൻ രാജാവ്​ നൽകിവരുന്ന സഹായങ്ങൾക്ക്​ അദ്ദേഹം നന്ദി രേഖപ്പെടുത്തി. മക്ക, മദീന പട്ടണങ്ങൾ വികസിച്ചു കൊണ്ടിരിക്കുകയാണ്​. അതിന്​ ആക്കം കൂട്ടുന്നതാണ്​ അൽഹറമൈൻ പദ്ധതി. തീർഥാടകർക്കുള്ള വലിയ സേവനമാണിത്​.

സ്​റ്റേഷനിൽ സ്വദേശികളായ യുവതീ യുവാക്കൾ സേവന നിരതരാകുന്നത്​ ഏറെ അഭിമാനമുണ്ടാക്കുന്നുവെന്നും മദീന ഗവർണർ പറഞ്ഞു. മസ്​ജിദുൽ ഹറാമിലെ ജുമുഅ നമസ്​കാരത്തിലും അദ്ദേഹം പ​​െങ്കടുത്തു. ശേഷം ഇമാമുമാരുമായി കൂടിക്കാഴ്​ചയും നടത്തി. ഗതാഗത മന്ത്രി ഡോ. നബീൽ ആമൂദി, ഗതാഗത അതോറിറ്റി മേധാവി ഡോ. റുമൈഹ്​ അൽറുമൈഹ്​,  മദീന ഗവർണറേറ്റ്​ അണ്ടർ സെക്രട്ടറി വുഹൈബ്, ​ അൽസഹ്​ലി, മസ്​ജിദുന്നബവി ഇമാമുമാർ തുടങ്ങിയവർ ഗവർണറോടൊപ്പമുണ്ടായിരുന്നു.

മക്കയിലെത്തിയ മദീന ഗവർണറെ മക്കാ മേഖല ഗവർണറേറ്റ്​ അണ്ടർസെക്രട്ടറി അമീർ ഫൈസൽ ബിൻ മുഹമ്മദ്​ ബിൻ സഅദ്​, മക്ക മേയർ എൻജിനീയർ മുഹമ്മദ്​ അൽഖുവൈഹസ്​, ഇരുഹറം കാര്യാലയ​ മേധാവി ഡോ. അബ്​ദുറഹ്​മാൻ അൽ സുദൈസ്​ എന്നിവർ ചേർന്നു സ്വീകരിച്ചു. 2017 അവസാനം ആരംഭിച്ച പരീക്ഷണ ഒാട്ടം തുടരുകയാണെന്ന്​ ഗതാഗത മന്ത്രി ഡോ. നബീൽ അൽആമൂദി പറഞ്ഞു. ഒരോ വരാന്ത്യ അവധി ദിവസങ്ങളിലും വ്യവസ്​ഥാപിതമായി പരീക്ഷണം നടന്നുവരുന്നു​.