ഹജ്ജ് വിജയം: നന്ദി അറിയിച്ച് സൽമാൻ രാജാവ്

ജിദ്ദ: ഈ വർഷത്തെ ഹജ്ജ് തീർഥാടനത്തിന്റെ വിജയത്തിൽ ആഭ്യന്തര മന്ത്രിയും സുപ്രീം ഹജ്ജ്​ കമ്മിറ്റി ചെയർമാനുമായ അമീർ അബ്​ദുൽ അസീസ്​ ബിൻ സഊദിന്​ സൗദി ഭരണാധികാരി സൽമാൻ രാജാവ്​​ നന്ദി അറിയിച്ചു. ബലിപെരുന്നാൾ ആശംസ അറിയിച്ചും ഹജ്ജ്​ വിജയം പരാമർശിച്ചും ആഭ്യന്തര മന്ത്രി അയച്ച സന്ദേശത്തിന്​ നൽകിയ മറുപടി സന്ദേശത്തിലാണ് മന്ത്രിക്കും സുരക്ഷ രംഗത്ത്​ പ്രവർത്തിച്ച വകുപ്പുകൾക്കും രാജാവ്​ നന്ദി അറിയിക്കാൻ നിർദേശം നൽകിയത്​​. ദൈവകാരുണ്യത്തോടൊപ്പം, കോവിഡിനെ പ്രതിരോധിക്കുന്നതിന് ആരോഗ്യ മുൻകരുതലുൾപ്പെടെ സ്വീകരിച്ച നടപടികളും ഹജ്ജുമായി ബന്ധപ്പെട്ട വകുപ്പുകൾ നടത്തിയ ശ്രമങ്ങളുടെയും ഫലമാണ്​ വിജയമെന്ന്​ സൽമാൻ രാജാവ് സന്ദേശത്തിൽ പറഞ്ഞു.​

കിരീടാവകാശി അമീർ മുഹമ്മദ്​ ബിൻ സൽമാനും ആഭ്യന്തര മന്ത്രിക്ക്​ നന്ദി അറിയിച്ച് സന്ദേശമയച്ചു. ബലിപെരുന്നാളിൽ അഭിനന്ദനം അറിയിച്ചും ഹജ്ജ്​ വിജയം പരാമർശിച്ചും അയച്ച സന്ദേശം കിട്ടിയെന്ന് കിരീടാവകാശി പറഞ്ഞു. നിങ്ങളെ എല്ലാവരെയും അഭിനന്ദിക്കാൻ ഞങ്ങൾ ആഗ്രഹിക്കുന്നു.

ഈ വർഷത്തെ ഹജ്ജ് സീസണിന്റെ വിജയത്തിനും തീർഥാടകർക്ക് അവരുടെ കർമങ്ങൾ അനായാസമായും ശാന്തമായും നിർവഹിക്കാൻ കഴിഞ്ഞതിനും​ ദൈവത്തിന്​ സ്​തുതി.

ഹജ്ജ് ദൗത്യത്തിൽ ഏർപ്പെട്ടിരിക്കുന്ന എല്ലാ കക്ഷികൾക്കും അവരുടെ ശ്രമങ്ങൾക്കും നന്ദി പറയുന്നു. നേടിയ വിജയത്തെ പ്രശംസിക്കുന്നുവെന്നും കിരീടാവകാശി മറുപടി സന്ദേശത്തിൽ പറഞ്ഞു.