കേരള ഹാജിമാർ  ഇന്ന്​ മക്കയിൽ 

ജിദ്ദ: കേരള സംസ്​ഥാന ഹജ്ജ്​ കമ്മിറ്റി വഴി വരുന്ന തീർഥാടകർ ഞായറാഴ്​ച  ജിദ്ദ വിമാനത്താവളത്തിലിറങ്ങും. നടപടിക്രമങ്ങൾ പൂർത്തിയാക്കി ഉച്ചക്ക്​ രണ്ട്​ മണിയോടെ ആദ്യ സംഘം മക്കയിലെത്തുമെന്നാണ്​ പ്രതീക്ഷിക്കുന്നത്​. ഹജ്ജ്​ ടെർമിനലിലും മക്കയിലും  ഹാജിമാരെ സ്വീകരിക്കാൻ മലയാളി സന്നദ്ധ സംഘടനകൾ തയാറെടുത്തിരിക്കയാണ്​. മറ്റേത്​ രാജ്യത്തു നിന്നുള്ള ഹാജിമാരെ സ്വീകരിക്കുന്നതിനേക്കാളും ആത്​മഹർഷത്തോടെയാണ്​ തങ്ങളുടെ നാട്ടിൽ നിന്നുള്ളവരെ സ്വീകരിക്കാൻ മലയാളികൾ കാത്തിരിക്കുന്നത്​. 900 ​ഹാജിമാരാണ്​ മൂന്ന്​ വിമാനങ്ങളിലായി ആദ്യ ദിനമിറങ്ങുക. വരും ദിവസങ്ങളിലും ഇത്രയും ഹാജിമാർ വീതം ജിദ്ദയിലിറങ്ങുമെന്നാണ്​ സംസ്​ഥാന ഹജ്ജ്​ കമ്മിറ്റി  അറിയിച്ചത്​.

ഹറമിൽ നിന്ന്​ 10 കിലോമീറ്റർ അകലെ അസീസിയ്യയിലെ ബിൻഹുമൈദിൽ   ബ്രാഞ്ച്​  അഞ്ചിൽ  267,270  ,286,329 നമ്പർ കെട്ടിടങ്ങളിലാണ്​  ആദ്യസംഘത്തിലെത്തുന്ന ഹാജിമാർക്ക് താമസം ഒരുക്കിയിരിക്കുന്നത്. ഇവിടെ നിന്ന്​ 24  മണിക്കൂറും ബസ് മാർഗം  ഹറമിൽ പോകാൻ  സൗകര്യം ഉണ്ടായിരിക്കും.  അഞ്ച്​ പേർക്ക് താമസിക്കാൻ  സൗകര്യമുള്ള  ബാത്​ അറ്റാച്ച്​ഡ്​​ റൂമുകളാണ് ഒരുക്കിയത്​. റൂമിൽ  ഭക്ഷണം പാകം ചെയ്യാൻ  ഗ്യാസ്​ അടുപ്പും  ഒരുക്കിയിട്ടുണ്ട്. സംസം വെള്ളം ‘മുത്തവിഫുമാർ’ എല്ലാ ദിവസവും റൂമുകളിൽ എത്തിക്കും. 200  ഹാജിമാർക്ക്​  ഒരു വളണ്ടിയർ എന്ന തോതിൽ  ഹജ്ജ് മിഷൻ വളണ്ടിയർമാരുണ്ടാവും.   ഓരോ ബ്രാഞ്ചിലും  പ്ര​േത്യക ഡിസ്‌പെൻസറികൾ ഹാജിമാരുടെ പ്രാഥമിക ചികത്സക്ക്​ ഒരുക്കിയിട്ടുണ്ട്.

മക്കയിലെ മലയാളി സന്നദ്ധ സംഘടനകൾ കേരള ഹാജിമാരെ സ്വീകരിക്കാൻ പ്രത്യേകം ഒരുങ്ങിയിട്ടുണ്ട്​. മുസല്ലയടങ്ങിയ ഭക്ഷണ കിറ്റ് നൽകിയാണ്​   ഹാജിമാരെ സ്വീകരിക്കുക എന്ന്​ കെ.എം.സി.സി അറിയിച്ചു. യാത്രാക്ഷീണവുമായി വരുന്ന തീർഥാടകർക്ക്​  സംഘടനകൾ കഞ്ഞിയൊരുക്കുന്നുണ്ട്​. ത്വവാഫ്,​ സഅ്​യ്​ കർമങ്ങൾക്ക്​ ഹാജിമാരെ സഹായിക്കാനും  മരുന്ന്​ വിതരണത്തിനും സംഘടനകൾ ഒരുക്കങ്ങൾ നടത്തിയിട്ടുണ്ട്​.