ഹജ്ജ്​ അപേക്ഷകൾ തരംതിരിക്കൽ നടപടി പൂർത്തിയായി

ജിദ്ദ: ഹജ്ജിന്​ അപേക്ഷിക്കാനുള്ള കാലാവധി അവസാനിച്ചതോടെ അപേക്ഷകൾ ഇലക്ട്രോണിക്​ സംവിധാനം വഴി തരംതിരിക്കൽ നടപടി പൂർത്തിയായതായി സൗദി ഹജ്ജ്​  മന്ത്രാലയം അറിയിച്ചു. കോവിഡ്​ പശ്ചാത്തലത്തിൽ സ്വദേശികളും രാജ്യത്തിനകത്ത്​ താമസിക്കുന്ന വിദേശികളുമായ പരിമിതമായ ആളുകൾക്കാണ്​ ഇത്തവണ ഹജ്ജിന്​  അവസരമൊരുക്കുന്നത്​. രാജ്യത്തിനകത്ത്​ താമസിക്കുന്ന 160 രാജ്യക്കാരുടെ അപേക്ഷകൾ തരംതിരിച്ചയായി ഹജ്ജ്​ മന്ത്രാലയം വ്യക്തമാക്കി​.

ഇത്തവണ മൊത്തം  തീർഥാടകരിൽ 70 ശതമാനം രാജ്യത്തിനകത്തെ വിദേശികൾക്കും 30 ശതമാനം സ്വദേശികൾക്കുമാണ്​ നിശ്ചയിച്ചിരിക്കുന്നത്​. അപേക്ഷകൾ പൂർണമായി പരിശോധിച്ച്​  തെരഞ്ഞെടുത്തവരുടെ പട്ടിക ഉടനെ പ്രസിദ്ധീകരിക്കും. അപേക്ഷ സമർപ്പിക്കൽ തുടക്ക നടപടിയാണ്​. അന്തിമമായി ഹജ്ജിന്​ തെരഞ്ഞെടുത്തു എന്നർഥമില്ലെന്നും മന്ത്രാലയം  നേരത്തെ വ്യക്തമാക്കിയിട്ടുണ്ട്​. കർശനമായ ആരോഗ്യ നിബന്ധകളാണ്​ ഇത്തവണ ഹജ്ജ്​ അപേക്ഷക്ക്​ ഏർപ്പെടുത്തിയത്​.

ഇലക്​ട്രോണിക്​ ട്രാക്കിൽ നിന്ന്​ ഇത്​  പൂർണമായും പാലിച്ചവരെയായിരിക്കും തെരഞ്ഞെടുക്കുക. വെള്ളിയാഴ്​ചയായിരുന്നു ഹജ്ജ്​ അപേക്ഷ നൽകേണ്ടിയിരുന്ന അവസാന തീയതി. കോവിഡ്​ പശ്ചാത്തലത്തിൽ  ഇത്തവണ ഹജ്ജിന്​ വേറിട്ട പദ്ധതിയായിരിക്കുമെന്നും ഹജ്ജ്​ മന്ത്രാലയം നേരത്തെ വ്യക്തമാക്കിയിരുന്നു.