കരമാർഗം ഹജ്ജ്​ തീർഥാടകരുടെ വരവ്​ തുടങ്ങി

ജിദ്ദ: കരമാർഗം ഹജ്ജ്​ തീർഥാടകരുടെ വരവ്​ തുടങ്ങി. വടക്കൻ അതിർത്തി മേഖലയിലെ അറാർ ജദീദ്​ പ്രവേശന കവാടം വഴിയാണ്​ ഇറാഖിൽ നിന്നുള്ള​ ആദ്യസംഘം സൗദിയിലെത്തിയത്​. ഇറാഖിൽ നിന്നും 8,000 ലധികം തീർഥാടകർ അറാർ അതിർത്തി വഴിയെത്തും.

മറ്റ്​ അതിർത്തി കവാടങ്ങൾ വഴിയും തീർഥാടകരുടെ വരവ്​ വരുംദിവസങ്ങളിലായി ആരംഭിക്കും. കരമാർഗമെത്തുന്ന തീർഥാടകരുടെ യാത്ര നടപടികൾ എളുപ്പമാക്കാൻ അതിർത്തി കവാടത്തിൽ പാസ്​പോർട്ട്​ ഡയക്​ട്രേറ്റ്​ നൂതനമായ സംവിധാനങ്ങളും ആവശ്യമായ ജോലിക്കാരെയുമാണ്​ ഒരുക്കിയിരിക്കുന്നത്​. ഇത്​ തീർഥാടകരുടെ യാത്രനടപടികൾ വേഗത്തിലാക്കാൻ സഹായിക്കുന്നു.

അറാർ ആരോഗ്യ കാര്യാലയത്തിന്​ കീഴിലെ പ്രത്യേക സംഘത്തെ തീർഥാടകർക്ക്​ സേവനത്തിനായി നിയോഗിച്ചിട്ടുണ്ട്​. തീർഥാടകർ കടന്നുപോകുന്ന വഴികളിൽ വേണ്ട സുരക്ഷ, ആരോഗ്യ സേവനങ്ങൾ വിവിധ മേഖല ഗവർണറേറ്റുകളും ഒരുക്കിയിട്ടുണ്ട്​. യാത്ര നടപടികൾ പൂർത്തിയാക്കി അൽജൗഫ്​ മേഖലയിലെ അബൂ അജ്​റം മദീനത്തുൽ ഹുജ്ജാജിലെത്തിയ ഇറാഖ്​ തീർഥാടകരെ പൂക്കൾ നൽകി സ്വീകരിച്ചു