ജിദ്ദ വഴിയും ഹജ്ജ്​ തീർഥാടകർ എത്തിത്തുടങ്ങി, ആദ്യമെത്തിയത്​ ബംഗ്ലാദേശി സംഘം

ജിദ്ദ: മദീനയിൽ ആദ്യ ഇന്ത്യൻ ഹജ്ജ്​ തീർഥാടക സംഘം എത്തിയതിന്​ പിന്നാലെ ജിദ്ദ വഴിയും ലോകത്തി​െൻറ വിവിധ ഭാഗങ്ങളിൽനിന്ന്​ തീർഥാടകർ എത്തിത്തുടങ്ങി. ബംഗ്ലാദേശിൽനിന്നുള്ള 396 തീർഥാടകരാണ്​ ജിദ്ദ കിങ്​ അബ്​ദുൽ അസീസ്​ അന്താരാഷ്​ട്ര വിമാനത്താവളത്തിൽ ചൊവ്വാഴ്​ച രാവിലെ എത്തിയത്​. സൗദി ഗതാഗത ലോജിസ്​റ്റിക്​ മന്ത്രി എൻജി. സാലെ അൽ ജാസിറും ഉദ്യോഗസ്​ഥരും ചേർന്ന്​ വരവേറ്റു.

പിന്നീട്​ പാകിസ്​താനിൽനിന്നുള്ള തീർഥാടകസംഘവും എത്തി. വിവിധ സുരക്ഷാ ഏജൻസികളുടെയും സ്വകാര്യ മേഖലയിലെ പങ്കാളികളുടെയും സംയോജിത സേവന സംവിധാനത്തിലൂടെ, ഈ സീസണിലെ ആദ്യ ഹജ്ജ് വിമാനങ്ങളെ സ്വാഗതം ചെയ്യുന്നതിൽ ഗതാഗത, ലോജിസ്​റ്റിക്സ് സംവിധാനത്തിന് അഭിമാനവും സന്തോഷവുമുണ്ടെന്ന് മന്ത്രി അൽ-ജാസർ പറഞ്ഞു. അല്ലാഹുവി​െൻറ അതിഥികളെ സേവിക്കുന്നതിനും അവരുടെ അഭിലാഷങ്ങൾ നിറവേറ്റുന്ന സുരക്ഷിതവും സുഗമവുമായ ഗതാഗത അനുഭവം നൽകുന്നതിനും ഗതാഗത ലോജിസ്​റ്റിക്​സ്​ സംവിധാനത്തി​െൻറ മുഴുവൻ ശേഷിയും പ്രയോജനപ്പെടുത്തണമെന്ന സൗദി ഭരണകൂടത്തി​െൻറ നിർദേശാനുസരണം എല്ലാം സജ്ജമാക്കിയെന്നും മന്ത്രി കൂട്ടിച്ചേർത്തു.

രാജ്യത്തെ ആറ്​ പ്രധാന വിമാനത്താവളങ്ങൾ ഹജ്ജ്​ തീർഥാടകരുടെ സേവനത്തിനായി പ്രത്യേകം സജ്ജീകരിച്ചിട്ടുണ്ട്​. ജിദ്ദ കിങ്​ അബ്​ദുൽ അസീസ്​ ഇൻറർനാഷനൽ എയർപ്പോർട്ട്​, മദീന പ്രിൻസ്​ മുഹമ്മദ്​ ബിൻ അബ്​ദുൽ അസീസ്​ എയർപ്പോർട്ട്​, യാംബു പ്രിൻസ്​ അബ്​ദുൽ മുഹ്​സിൻ ബിൻ അബ്​ദുൽ അസീസ്​ എയർപ്പോർട്ട്​, ത്വാഇഫ്​ ഇൻറർനാഷനൽ എയർപ്പോർട്ട്​, റിയാദ്​ കിങ്​ ഖാലിദ്​ ഇൻറർനാഷനൽ എയർപ്പോർട്ട്​, ദമ്മാം കിങ്​ ഫഹദ്​ ഇൻറർനാഷനൽ എയ​ർപ്പോർട്ട്​ എന്നിവയാണ്​ അവ.

ദുൽ ഹജ്ജ്​ മാസാരംഭം വരെ വരും ദിവസങ്ങളിൽ വിമാന സർവിസുകൾ തുടരുമെന്നും തീർഥാടകരുടെ വരവ് മുതൽ പുറപ്പെടൽ വരെയുള്ള യാത്ര സുഗമമാക്കുന്നതിന് ലക്ഷ്യമിട്ടുള്ള സംയോജിത സേവന സംവിധാനത്തിലൂടെ ഇരു ഹറമുകളെയും അല്ലാഹുവി​െൻറ അതിഥികളെയും സേവിക്കുന്നതിൽ രാജ്യത്തി​െൻറ മുൻനിര സ്ഥാനം വർദ്ധിപ്പിക്കുമെന്നും അദ്ദേഹം വിശദീകരിച്ചു.