ഹഫറുൽ ബാത്വിനിൽ ആരോഗ്യ മേഖലയിൽ 12 വികസന പദ്ധതികൾ

ദമ്മാം: കിഴക്കൻ സൗദിയിലെ ഹഫറുൽ ബാത്വിനിൽ ആരോഗ്യ മന്ത്രാലയത്തി​​​െൻറ മേൽനോട്ടത്തിൽ പുതിയ 12 പദ്ധതികൾ വരുന്നതായി റിപ്പോർട്ട്​. ആരോഗ്യ രംഗത്ത്​ വൻ കുതിച്ചു ചാട്ടത്തിന്​ വഴിയൊരുക്കുന്ന പദ്ധതിയുടെ ഉദ്​ഘാടനം ആരോഗ്യ മന്ത്രി ഡോ.തൗഫീഖ്​ ഫൗസാൻ അൽറബീഅ നിർവഹിച്ചു. ഉദ്​ഘാടന ചടങ്ങിൽ വിവിധ മേഖലകളിലെ പ്രമുഖർ സംബന്ധിച്ചു. 44 ദശലക്ഷം റിയാൽ മുതൽമുടക്കുള്ള ചെറുതും വലുതുമായ പദ്ധതികളാണ്​ യാഥാർഥ്യമാവാനിരിക്കുന്നത്​. കുട്ടികൾക്കും അമ്മമാർക്കും മാത്രമായുള്ള ആശുപത്രികൾ അടക്കമുള്ള സമഗ്ര പദ്ധതികളാണ്​ മുഖ്യ ആകർഷകം​. നിലവിലുള്ള ആശുപ​ത്രികളുടെ നവീകരണവും ആധുനിക യന്ത്രവത്​കരണവും പദ്ധതിയുടെ പ്രധാന ലക്ഷ്യങ്ങളാണ്​. ആയിരം കിടക്കകളുള്ള അഡ്​മിറ്റ്​ സംവിധാനവും അത്യാധുനിക സജ്ജീകരണങ്ങളും ഇവിടങ്ങളിൽ ഉറപ്പ്​ വരുത്തും. 

ഹഫറുൽ ബാത്വിൻ മേഖലയിൽ നിലവിൽ​ ഏഴ്​ ആശുപത്രികൾ ഉണ്ടെന്നാണ്​ കണക്ക്​​. എന്നാൽ, വിദഗ്​ധ ചികിത്സകളാവശ്യമായ കേസുകളിൽ തുടർ പരിശോധനക്കും ചികിത്സക്കുമുള്ള സംവിധാനങ്ങൾ അപര്യാപ്​തമാണ്​. ഇൗ​ സാഹചര്യത്തിലാണ്​ അത്യാധുനിക സംവിധാനങ്ങളോടെ വിദഗ്​ധ ചികിത്സയൊരുക്കാനുള്ള പദ്ധതികൾ  ആവിഷ്​കരിക്കുന്നത്​. അത്യാഹിത വിഭാഗം, ഡയാലിസിസ്​ സ​​െൻറർ, വൃക്കരോഗ വിഭാഗം, ഗൈനക്കോളജി, ഹൃദ്രോഗ വിഭാഗം, എല്ല്​ രോഗ വിഭാഗം, ​ദന്തരോഗ വിഭാഗം തുടങ്ങി ഒ​േട്ടറെ ചികിത്സാ വിഭാഗങ്ങളിൽ പ്രത്യേകം വകുപ്പുകൾ രൂപവത്​കരിക്കുന്ന തരത്തിലാണ്​ പദ്ധതിയുടെ ആസൂത്രണം. കൂടാതെ ആശുപ​ത്രികളോട്​ ചേർന്ന്​ രക്​ത ബാങ്കുകളും രോഗികൾക്കുള്ള വിശ്രമ മുറികളും സ്​ഥാപിക്കും. ആരോഗ്യ രംഗത്ത്​ വൻ നേട്ടമാവുന്ന പദ്ധതി യാഥാർഥ്യമാവുന്നതോടെ കിഴക്കൻ ​​പ്രവിശ്യ നിവാസികൾക്ക്​ ഏറെ ആശ്വാസകരമാവുമെന്നാണ്​ വിലയിരുത്തൽ.