സാംത, അൽദായർ എന്നിവിടങ്ങളിൽ 24 മണിക്കൂർ കർഫ്യൂ ഇന്ന്​ മുതൽ

റിയാദ്: സൗദി അറേബ്യയിൽ കൂടുതൽ ഭാഗങ്ങളിൽ 24 മണിക്കൂർ കർഫ്യൂ പ്രഖ്യാപിച്ചു. സാംത, അൽദായര്‍ എന്നീ പ്രദേശങ്ങളിലാണ് ​ മുഴുവൻ സമയ നിരോധനാജ്ഞ ഏർപ്പെടുത്തിയതായി ആഭ്യന്തരമന്ത്രാലയം അറിയിച്ചത്. അനിശ്ചിത കാലത്തേക്കാണ് ഇത്​.

വ െള്ളിയാഴ്​ച ഉച്ചകഴിഞ്ഞ്​ മൂന്ന്​ മുതൽ നിയമം പ്രാബല്യത്തിലായി. നേരത്തെ ഇവിടെ 11 മണിക്കൂർ കർഫ്യൂവാണ്​ ഉണ്ടായിരുന്നത്​. സാംത, അൽദായർ മേഖലകളിൽ കോവിഡ്​ രോഗികളുടെ എണ്ണം ഉയരുന്ന പശ്ചാത്തലത്തിലാണ്​ പുതിയ നടപടി. പ്രധാന നഗരങ്ങളിലെല്ലാം കഴിഞ്ഞയാഴ്​ച തന്നെ 24 മണിക്കൂർ കർഫ്യൂ ഏർപ്പെടുത്തിയിരുന്നു.

കർഫ്യൂ ഇളവുള്ള മേഖലകൾക്ക്​ ആനുകൂല്യം തുടരും. ഭക്ഷണം, ചികിത്സ പോലുള്ള അത്യാവശ്യകാര്യങ്ങൾക്ക്​ തൊട്ടടുത്തുള്ള സ്ഥാപനങ്ങളിൽ രാവിലെ ആറിനും ഉച്ചക്ക്​ ശേഷം മൂന്നിനും ഇടയിൽ പോകാൻ അനുമതിയുണ്ട്​.

താമസ സ്ഥലങ്ങളില്‍ അത്യാവശ്യത്തിന് വാഹനം ഉപയോഗിക്കുകയാണെങ്കില്‍ ഡ്രൈവർക്ക്​ പുറമെ ഒരാൾക്ക്​ കൂടി യാത്ര ചെയ്യാം. ബഖാലകള്‍, ഫാർമസികള്‍, പെട്രോള്‍ പമ്പുകള്‍, ഗാസ് കടകള്‍, ബാങ്ക്, പ്ലംബര്‍, ഇലക്ട്രീഷ്യന്‍, ജലവിതരണം‍, മലിനജല ടാങ്കർ എന്നിവക്ക് പ്രവർത്തിക്കാം. അത്യാവശ്യത്തിനാണെങ്കിൽ പോലും കുട്ടികൾ പുറത്തിറങ്ങരുത്​.