രണ്ട്​ മലയാളി പെൺകുട്ടികൾ രണ്ടര വർഷമായി ദമ്മാമിൽ വീട്ടുതടങ്കലിൽ

ദമ്മാം: രണ്ട്​ മലയാളി പെൺകുട്ടികൾ രണ്ടര വർഷമായി ദമ്മാമിൽ സ്വദേശി പൗര​​​െൻറ വീട്ടുതടങ്കലിൽ കഴിയുന്നതായി റിപ്പോർട്ട്​. ​​ശ്രീലങ്കൻ സ്വദേശിയായ പിതാവി​​​െൻറയും വയനാട്​ സ്വദേശിനി മാതാവി​​​െൻറയും ആറ്​ മക്കളിൽ ആറും നാലും വയസുള്ള ​ഇളയ മക്കളാണ്​ സ്വദേശി പൗര​​​െൻറ വീട്ടുതടങ്കലിലുള്ളത്​. രണ്ടര വർഷത്തോളമായി തുടരുന്ന ബന്ധനത്തിൽ നിന്ന്​ കുട്ടികളെ വിട്ടുകിട്ടുന്നതിനുള്ള ​​ശ്രമങ്ങൾ റിയാദിലെ സാമൂഹിക പ്രവർത്തകൻ സിദ്ദീഖ്​ തുവ്വൂരി​​​െൻറ നേതൃത്വത്തിൽ പുരോഗമിക്കുന്നു. സ്വർണ വ്യാപാരിയായ ശ്രീലങ്കൻ പൗ​രൻ വയനാട്​ സ്വദേശിനിയെ 12 വർഷം മുമ്പാണ്​ കേരളത്തിൽ വെച്ച്​ മതാചാര പ്രകാരം വിവാഹം ചെയ്​തത്​.

തുടർന്ന്​ സൗദിയിലെത്തിയ ഇരുവരും 10 വർഷം ദമ്മാമിൽ കഴിഞ്ഞു. സൗദി പൗരനും രണ്ട്​ ആ​ഫ്രിക്കക്കാരുമടങ്ങിയ സംഘത്തോടൊപ്പം പങ്കാളിത്ത വ്യവസ്​ഥയിൽ ദമ്മാമിൽ ഭർത്താവ്​​​ സ്വർണ വ്യാപാരം നടത്തുകയായിരുന്നു​. ഇടക്കാലത്ത്​ വ്യാപാരത്തിൽ മാന്ദ്യം നേരിട്ടതോടെ ആഫ്രിക്കൻ പങ്കാളികൾ മുങ്ങി. ഇതോടെ ശ്രീലങ്കക്കാരനോട്​ കൂടുതൽ സൗഹാർദപൂർവം പെരുമാറിയ സൗദി പൗരൻ പെൺമക്കളെ തന്ത്രപരമായി കൈക്കലാക്കിയെന്നാണ്​ മാതാവ്​ വയനാട്​ സ്വദേശിനിയുടെ പരാതി. ആഫ്രിക്കൻ വ്യാപാരികൾ അപഹരിച്ച പണവും നഷ്​ടമായ തുകയും തിരിച്ചുനൽകിയാൽ മാത്രമേ കുട്ടികളെ വിട്ടുനൽകൂ എന്നാണ്​ സ്വദേശിയുടെ നിലപാട്​. മൂന്ന്​ ലക്ഷം റിയാലാണ്​ (54 ലക്ഷം ഇന്ത്യൻ രൂപ)​ ഇയാൾ ആവശ്യപ്പെടുന്നത്​. ഇത്​ കൂടാതെ രണ്ടര വർഷമായി കുട്ടികളെ സംരക്ഷിച്ച ചെലവിലേക്കായി പ്രതിമാസം 5,000 റിയാൽ വീതം നൽകണമെന്നും​ ആവശ്യപ്പെടുന്നു. 10​ മാസം മുമ്പ്​ സൗദിയിൽ തിരിച്ചെത്തിയ മാതാവ്​ കുഞ്ഞുങ്ങളെ കാണാൻ ​​ശ്രമിച്ചെങ്കിലും അനുവദിച്ചില്ല.

എം.​െഎ ഷാനവാസ്​ എം.പി മുഖേനെ വിദേശ കാര്യ മന്ത്രാലയം, സൗദി എംബസി എന്നിവിടങ്ങളിലെ അധികാരികൾക്ക്​ പരാതി നൽകിയിരുന്നു. ഏറെ സങ്കീർണതകളുള്ള കേസിൽ ഇന്ത്യൻ എംബസിയുടെ പൂർണ പിന്തുണയുണ്ടെന്നും പരിഹാരത്തിനായുള്ള ​​ഉൗർജിത ശ്രമങ്ങൾ വിവിധ തലങ്ങളിൽ നടക്കുന്നതായും സാമൂഹിക പ്രവർത്തകൻ സിദ്ദീഖ്​ തുവ്വൂർ ‘ഗൾഫ്​ മാധ്യമ’ത്തോട്​ പറഞ്ഞു. രണ്ട്​ ​കുട്ടികളും വീട്ടുതടങ്കലിൽ സുരക്ഷിതരാണെന്നാണ്​ വിശ്വസിക്കുന്നതെന്നും അദ്ദേഹം പറഞ്ഞു. കേസി​​​െൻറ ഏകോപനത്തിനായി ബുധനാഴ്​ച ദമ്മാമിലെത്തിയ അദ്ദേഹം ദിവസങ്ങൾക്കുള്ളിൽ ഫലമുണ്ടാകുമെന്ന്​പ്രത്യാശ പ്രകടിപ്പിച്ചു.