ഗ്വാണ്ടനാമോ തടവുകാരനെ  സൗദിക്ക്​ കൈമാറി

ജിദ്ദ: അമേരിക്കൻ തടവറയായ ഗ്വാണ്ടനാമോയിൽ നിന്ന്​ മോചിപ്പിക്കപ്പെട്ടയാൾ സൗദിയിലെത്തി. അഹമദ്​ ഹസ അൽദർബിയെന്ന സൗദി പൗരനെയാണ്​ കഴിഞ്ഞദിവസം രാത്രി റിയാദിലെത്തിച്ചത്​. അമേരിക്കൻ പ്രസിഡൻറ്​ ആയി ഡോണൾഡ്​ ട്രംപ്​ അധികാരമേറ്റശേഷം ആദ്യമായാണ്​ ഗ്വാണ്ടനാമോ തടവുകാരനെ കൈമാറുന്നത്​.

2002 ൽ ഏഡൻ കടലിടുക്കിൽ ഫ്രഞ്ച്​ എണ്ണക്കപ്പലിന്​ നേരെയുണ്ടായ ആക്രമണവുമായി ബന്ധപ്പെട്ടാണ്​ അൽദർബി തടവിലായത്​. ബെൽജിയം സ്വദേശി കൊല്ലപ്പെടുകയും 12 പേർക്ക്​ പരിക്കേൽക്കുകയും ചെയ്​ത ഭീകരാക്രമണത്തിന്​ സഹായം നൽകിയെന്നതായിരുന്നു കുറ്റം. ഏഡൻ കടലിടുക്കിലെ ഏറ്റവും വലിയ എണ്ണ ചോർച്ചക്കും ഇൗ ആക്രമണം കാരണമായിരുന്നു.

13 വർഷത്തെ തടവിനാണ്​ അൽദർബി ശിക്ഷിക്കപ്പെട്ടത്​. നാലുവർഷത്തെ ഗ്വാണ്ടനാമോ വാസത്തിന്​ ശേഷം ബാക്കി ശിക്ഷ റിയാദിലെ പുനരധിവാസ കേന്ദ്രത്തിൽ അനുഭവിച്ചാൽ മതിയെന്ന ധാരണയെ തുടർന്നാണ്​ ഇയാളെ സൗദിയിലേക്ക്​ എത്തിച്ചത്​. ഇ​േതാടെ ഗ്വാണ്ടനാമോയിലെ തടവുകാരുടെ എണ്ണം 40 ആയി കുറഞ്ഞു.