ദവാദ്മിയിൽ ഇതര മതസ്ഥർക്കായി ശ്​മശാനം അനുവദിച്ചു

റിയാദ്​: സൗദി ഭരണകൂടത്തി​​െൻറ കാരുണ്യത്താൽ ഇതര മതസ്ഥരുടെ മൃതദേഹങ്ങൾ സംസ്​കരിക്കാൻ ദവാദ്മിയിൽ സ്ഥലം അനുവദിച്ചു. റിയാദിൽ നിന്ന്​ 230 കിലോമീറ്റർ അകലെയാണ്​ ദവാദ്​മി പട്ടണം. ആദ്യമായി മറവു ചെയ്തത് മെയ് 31ന്​ ദവാദ്മി ജനറൽ ആശുപത്രിയിൽ കോവിഡ് ബാധിച്ചു മരിച്ച മലപ്പുറം മഞ്ചേരി മഞ്ഞപ്പറ്റ സ്വദേശി ഡൊമിനിക്കി​​െൻറ (38) മൃതദേഹമാണ്​. 

നിരവധി സാമൂഹിക പ്രവർത്തകരുടെ പ്രയത്​നത്തി​​െൻറ ഫലമായാണ് ശ്​മശാനത്തിന്​ സ്ഥലം അനുവദിച്ചു കിട്ടിയത്. ദവാദ്മി നഗരത്തിൽ നിന്ന് ഒമ്പത്​ കിലോമീറ്റർ അകലെ ശാര റോഡിലാണ് സ്ഥലം ലഭ്യമായത്. നിരവധി കാലമായി സാമൂഹിക പ്രവർത്തകരുടെ ആവശ്യമായിരുന്നു ഇത്​. മൂന്നു ദിവസം മുമ്പാണ് സർക്കാർ അനുമതി നൽകിയത്. ഞായറാഴ്ച രാവിലെ ആദ്യ മൃതദേഹം സാമൂഹിക പ്രവർത്തകർ ഏറ്റുവാങ്ങി ഇവിടെ മറമാടുകയായിരുന്നു. 

ആദ്യ ഖബറിടത്തിലേക്ക് ആദ്യ മൃതദേഹം ഇറക്കുമ്പോൾ രാജ്യം സൈനികർക്ക് നൽകുന്നത് പോലെയുള്ള പ്ര​േത്യക ഉപചാര തുണികൊണ്ട് മൂടി ആദരവ് നൽകിയിരുന്നു. കോവിഡ് ബാധിച്ചു മരിച്ചവരുടെ മൃതദേഹങ്ങളുടെ സംസ്‌കാര ചടങ്ങിൽ അനാദരവ് കാട്ടുന്ന ഈ സമയത്ത്​ സൗദിയുടെ ഈ കാരുണ്യം ദവാദ്മിയിലെ സാമൂഹിക പ്രവർത്തകർക്ക് പുത്തനുണർവ് സമ്മാനിച്ചിരിക്കുകയാണ്. അരാംകോയുടെ അൽയമാമ പ്രൊജക്ടിൽ ജീവനക്കാരനായിരുന്നു ഡൊമിനിക്.