മുന്തിരി മേളയുടെ മധുരം നുണയാം, ഇന്ന്​ മുതൽ

റിയാദ്​: മുന്തിരി പ്രിയർക്ക്​ രുചി നുണയാൻ ഇനി അഞ്ചുനാളുകളുടെ ഉത്സവം. ത്വാഇഫിന്​ തെക്ക്​ മയ്​സാൻ ​മേഖലയിലെ ബനീ സഅദിൽ മൂന്നാമത്​ മുന്തിരി മേള വ്യാഴാഴ്​ച ആരംഭിക്കും. മയ്​സാൻ മേഖല ഗവർണർ അബ്​ദുല്ല അൽഫായ്​ഫി ഉദ്​ഘാടനം ചെയ്യും. ഗവർണറുടെ നേരിട്ടുള്ള മേൽനോട്ടത്തിലാണ്​ മേള ഒരുങ്ങുന്നത്​. സൗദിയിലെ ഏറ്റവും വലിയ മുന്തിരിമേള ഇത്തവണ 31 മുന്തിരി കർഷകരുടെ പങ്കാളിത്തത്തോടെയാണ്​ സംഘടിപ്പിക്കുന്നത്​.
താഇഫിലെയും മറ്റ്​ മേഖലകളിലെയും മുന്തിരി തോട്ടങ്ങളിൽ നിന്നുള്ള ഉൽപന്നങ്ങളുമായി കർഷകർ മേളയിൽ അണിനിരക്കും. വിവിധയിനം മുന്തിരിക്കുലകൾ പ്രദർശനത്തിനും വിൽപനക്കുമെത്തും.

കറുപ്പ്​, ചുവപ്പ്​, പച്ച നിറങ്ങളിലുള്ള എല്ലായിനം മുന്തിരികളും സന്ദർശകരുടെ വായിൽ വെള്ളമൂറിക്കും വിധം മേളയിൽ നിറയും. മുൻ മേളകളിൽ നിന്ന്​ വ്യത്യസ്​തമായി ഇത്തവണ മുന്തിരി കൊണ്ടുണ്ടാക്കാൻ കഴിയുന്ന വിവിധ ഭക്ഷ്യോൽപന്നങ്ങളും മറ്റ്​ വസ്​തുക്കളും മേളയിൽ എത്തുമെന്ന്​ സംഘാടകസമിതി വൈസ്​ ചെയർമാൻ താഹിർ അൽസെയ്യാലി പറഞ്ഞു. കർഷകരുടെ വീടുകളിൽ തന്നെ നിർമിക്കുന്നതാണ്​ ഇൗ ഉൽപന്നങ്ങളും. ബനീ സഅദിലെ വിശാലമായ മൈതാനിയിൽ മേളക്കുവേണ്ടിയുള്ള ഒരുക്കങ്ങളെല്ലാം പൂർത്തിയായി. മേള നടത്തിപ്പ്​ സമിതിയിൽ വനിതകളുമുണ്ടെന്നും സ്​ത്രീ സന്ദർശകർക്ക്​ പ്രത്യേക സൗകര്യങ്ങൾ ഒരുക്കിയിട്ടുണ്ടെന്നും അദ്ദേഹം കൂട്ടിച്ചേർത്തു.

മുന്തിരി മേളയുടെ നടത്തിപ്പിലൂടെ കാർഷിക രംഗത്തെ അഭിവൃദ്ധിയോടൊപ്പം മേഖലയിൽ വിനോദ സഞ്ചാര സാധ്യതകൾ ഉപയോഗപ്പെടുത്തുക എന്ന ലക്ഷ്യവുമുണ്ടെന്ന്​ സംഘാടക സമിതി അംഗം ഖൈറാൻ തുത്തൈബി പറഞ്ഞു. സൗദി ആഭ്യന്തര വിനോദ സഞ്ചാര രംഗത്ത്​ മുന്തിരി മേളക്കും മയ്​സൻ മേഖലക്കും എന്ത്​ ചെയ്യാനാവും എന്ന അന്വേഷണമാണ്​ നടക്കുന്നത്​. കഴിഞ്ഞ രണ്ട്​ മേളകൾ ആ നിലയിലും വലിയ വിജയമായിരുന്നു. സന്ദർശകരുടെ വൻബാഹുല്യമാണ്​ മുൻ കാലത്തുണ്ടായത്​. ഇത്തവണ കൂടുതൽ ജനപങ്കാളിത്തമാണ്​ പ്രതീക്ഷിക്കുന്നത്​. പ്രദേശത്തി​​​​െൻറ സാമൂഹിക സാമ്പത്തിക രംഗങ്ങളിലെ വികസനത്തിനും അഭിവൃദ്ധിക്കും മേള വലിയ ഗുണം ചെയ്യുമെന്നും അദ്ദേഹം കൂട്ടിച്ചേർത്തു. 2016ലാണ്​ മയ്​സൻ ഗവർണർ മുൻകൈയ്യെടുത്ത്​ അദ്ദേഹത്തി​​​​െൻറ ത​ന്നെ സ്​പോൺസർഷിപ്പിൽ മുന്തിരിമേളക്ക്​ തുടക്കമിടുന്നത്​.