വിദ്യാർഥിയിൽ നിന്ന്​ സമ്മാനം വാങ്ങിയ കേസിൽ പ്രഫസറെ വെറുതെവിട്ടു

ദമ്മാം: വിദ്യാർഥിയിൽ നിന്ന്​ അനധികൃതമായി പാരിതോഷികം വാങ്ങിയെന്ന കേസിൽ സർവകലാശാല പ്രഫസറെ കോടതി വെറുതെവിട്ടു. കിഴക്കൻ പ്രവിശ്യയിലെ പ്രമുഖ സർവകലാശാലയിലെ ഇംഗ്ലീഷ് വിഭാഗം പ്രഫസർ ആന്ധ്രപ്രദേശ്​​ സ്വദേശി ദാവൂദ്​ ശൈഖിനെയാണ്​ ക​ുറ്റവിമുക്​തനാക്കിയത്​. അ​ന്വേഷണങ്ങൾക്കൊടുവിൽ വിശ്വസനീയമായ തെളിവുകളുടെ അഭാവത്തിലാണ്​ ആറ്​ മാസം നീണ്ട വിചാരണത്തടവിന്​ ശേഷം ദാവൂദ്​ ജയിൽ മോചിതനായത്​. വിദ്യാർഥിയുടെ പഠന കാര്യങ്ങളിൽ കൂടുതൽ ശ്രദ്ധ പതിപ്പിക്കണമെന്ന ആവശ്യത്തോടെ ​വിലകൂടിയ മൊബൈൽ ഫോൺ അറബ്​ വംശജനായ വിദ്യാർഥിയിൽ നിന്ന്​ കൈപറ്റിയെന്നാണ്​ കേസ്​.

എന്നാൽ, കോടതിയിൽ കുറ്റം നിഷേധിച്ച പ്രഫസർ, പൂർവ വൈരാഗ്യത്തി​​െൻറ അടിസ്​ഥാനത്തിലാണ്​ തനിക്കെതി​െ​ര കേസ്​ നൽകിയതെന്നും വാദിച്ചു. 
ഇതേ സർവകലാശാലയിൽ വർഷങ്ങളുടെ പ്രവർത്തന പരിചയമുള്ള താൻ അച്ചടക്ക ലംഘനം നടത്തിയ ഇൗ വിദ്യാർഥിക്കെതിരെ നടപടിയെടുത്തിരുന്നു. അക്കാരണത്താലാണ്​​ തനിക്കെതിരെ വിദ്യാർഥി വ്യാജ പരാതി നൽകിയതെന്ന്​​​ പ്രഫസർ വ്യക്​തമാക്കി. ഇതേ തുടർന്നാണ്​, ​കുറ്റം തെളിയിക്കാനാവാത്തതിനാൽ നിയമക്കുരുക്കുകൾ നീക്കി മോചനത്തിന്​ വഴിയൊരുങ്ങിയതെന്ന്​ ദമ്മാം ക്രിമിനൽ കോടതി അഭിഭാഷകൻ മുഹമ്മദ്​ നജാത്തി പറഞ്ഞു.