ഹജ്ജ്​ യാത്രയിൽ ഗദ്ദാഫി എന്ന പേര്​ പുലിവാലായി; നിശ്ചയദാർഢ്യവും ഭാഗ്യവും തുണയായി

മക്ക: ഹജ്ജിന്​ പുറപ്പെട്ട അമര്‍ അല്‍ മഹ്ദി മന്‍സൂര്‍ അല്‍ ഗദ്ദാഫി എന്ന ലിബിയൻ യുവാവി​ന്​ നേരിട്ട ദുരനുഭവത്തി​െൻറയും നിശ്ചയദാർഢ്യം ഭാഗ്യവും കൊണ്ട്​ അതിനെ അതിജീവിക്കാനായതി​ന്റെയും വിസ്​മയകരമായ കഥയാണിത്​. സ്വദേശത്തുനിന്ന്​ ജിദ്ദയിലേക്ക്​ പുറപ്പെടാൻ ലിബിയൻ തലസ്ഥാനത്തെ എയർപ്പോർട്ടിൽ എത്തിയതാണ്​​ യുവാവ്​. എന്നാൽ ഗദ്ദാഫി എന്ന പേര്​ പ്രശ്​നമായി.​ ലിബിയയുടെ മുൻ ഭരണാധികാരി മുഅമ്മര്‍ ഗദ്ദാഫിയുമായി സാമ്യമുള്ള അല്‍ ഗദ്ദാഫി എന്ന കുടുംബപ്പേരാണ്​ പുലിവാലായത്​. എയ​ർപ്പോർട്ടിലെ ഉദ്യോഗസ്ഥര്‍ സുരക്ഷാപ്രശ്‌നം ഉന്നയിച്ച് ഇമിഗ്രേഷന്‍ കൗണ്ടറിൽ അമറിനെ തടഞ്ഞുവച്ചു​. യാത്ര തുടരാവാനില്ല എന്ന്​ അവർ കർശനമായി പറഞ്ഞു.

കൂടെയുള്ളവര്‍ വിമാനത്തിൽ കയറുമ്പോഴും അമറിന്​ നോക്കി നിൽക്കാനെ കഴിഞ്ഞുള്ളൂ. എയർപോർട്ടിൽനിന്ന്​ പുറത്തുപോകാൻ സുരക്ഷാ ഉദ്യോഗസ്ഥർ ആവശ്യപ്പെട്ടു. എന്നാൽ ഹജ്ജിനുള്ള യാത്രക്കായി മുന്നോട്ടല്ലാതെ താന്‍ അവിടെ നിന്ന് മാറില്ലെന്ന് പ്രഖ്യാപിച്ച് നിലയുറപ്പിച്ചു. അതേസമയം യാദൃശ്ചികമായി ചിലത്​ അപ്പോൾ​ സംഭവിച്ചു​. ജിദ്ദയിലേക്ക്​ ടേക്കോഫ്​ ചെയ്​ത വിമാനത്തിന് അപത്രീക്ഷിതമായി​ സാങ്കേതിക തകരാര്‍ നേരിട്ടു. അടിയന്തരമായി തിരിച്ചിറക്കേണ്ടിവന്നു. റിപ്പയറിങ്ങിന്​ ശേഷം വീണ്ടും പറന്നുയർന്നെങ്കിലും തകരാർ ആവർത്തിച്ചു​. രണ്ടാമതും തിരിച്ചിറക്കി. ഇതോടെ ക്യാപ്​റ്റ​ന്റെ മനസ്​ മാറി. ‘അമര്‍ കൂടിയില്ലാതെ വിമാനം പറത്തില്ലെന്ന്’ അദ്ദേഹം കട്ടായം പറഞ്ഞു. ഒടുവിൽ അധികൃതര്‍ അമറിന്​ യാത്രാനുമതി നല്‍കി. അമർ വിമാനത്തിൽ കയറി. മൂന്നാമത്തെ ശ്രമത്തില്‍ തകരാറുകളൊന്നുമില്ലാതെ വിമാനം പറത്താൻ ക്യാപ്​റ്റന്​ കഴിഞ്ഞു. സുരക്ഷിതമായി വിമാനം ജിദ്ദയിലെത്തി. തന്റെ ജീവിതാഭിലാഷമായ ഹജ്ജ്​ നിർവഹിക്കാൻ അമർ ഇന്നലെ മക്കയിലുമെത്തി.